हामी सबैकाे संसारन्यूज

काठमाडौँ ।  नेपाली कांग्रेसले शान्तिपूर्ण वातावरणमा प्रतिनिधिसभा सदस्य निर्वाचन सम्पन्न गराउन सफल भएको भन्दै सरकार र निर्वाचन आयोगलाई धन्यवाद दिएको छ ।

पार्टीका सभापति गगन थापाले बिहीबार विज्ञप्ति जारी गर्दै निर्वाचन सफल बनाउन सहयोग पुर्‍याएकोमा सरकार तथा Election Commission Nepal प्रति विशेष आभार व्यक्त गर्नुभएको हो ।

विज्ञप्तिमा उहाँले निर्वाचनमा सहभागी भई आफ्नो अमूल्य मताधिकार प्रयोग गर्ने सम्पूर्ण आमाबुबा, दिदीबहिनी तथा दाजुभाइप्रति नेपाली कांग्रेसका तर्फबाट उच्च सम्मानसहित कृतज्ञता व्यक्त गर्नुभएको छ ।

उहाँले प्रतिनिधिसभा निर्वाचनमा देशव्यापी रूपमा मतदाताले देखाएको उत्साह र सक्रिय सहभागिताले लोकतन्त्रप्रतिको नेपाली जनताको निष्ठा र अटल प्रतिबद्धता पुनः एकपटक बलियो रूपमा अभिव्यक्त भएको उल्लेख गर्नुभएको छ ।

जनताको सक्रिय सहभागिताले एकातर्फ लोकतान्त्रिक प्रणालीप्रति गहिरो विश्वासलाई पुष्टि गरेको र अर्कोतर्फ राजनीतिक दलहरू तथा अब बन्ने सरकारलाई जनअपेक्षाअनुसार काम गर्न थप जिम्मेवार बनाएको पनि उहाँले बताउनुभएको छ ।

निर्वाचन सफल बनाउन अहोरात्र खटिएका राष्ट्रसेवक कर्मचारी तथा सम्पूर्ण सुरक्षा निकायप्रति हार्दिक आभार र बधाई व्यक्त गर्दै कांग्रेसले निर्वाचनमा जिम्मेवारीपूर्ण भूमिका निर्वाह गर्ने राजनीतिक दल, सञ्चारकर्मी तथा राष्ट्रिय तथा अन्तर्राष्ट्रिय पर्यवेक्षकहरूप्रति पनि धन्यवाद दिएको छ ।