हामी सबैकाे संसारन्यूज

काठमाडौं । नेपाल टेलिकम को प्रिपेड मोबाइल प्रयोगकर्ताले अब विश्वका ६२ देशमा रोमिङ सेवा प्रयोग गर्न सक्ने भएका छन्। कम्पनीले विभिन्न देशका ८९ सेवा प्रदायकसँग सम्झौता गरेपछि सेवा विस्तार गरिएको हो।

चालु आर्थिक वर्षको साउनपछि लाटभिया, स्लोभेनिया, टर्की, ताइवान (आरओसी), घाना, रोमानिया र लाओसका सेवा प्रदायकहरूसँग नयाँ सम्झौता भएको छ। साथै पाकिस्तान, बेलारुस र श्रीलंकामा समेत थप सेवा प्रदायकसँग सहकार्य विस्तार गरिएको कम्पनीले जनाएको छ।

यसअघि पनि अष्ट्रेलिया, क्यानडा, चीन, भारत, जापान, यूएई, युके, यूएसए लगायतका विभिन्न देशमा नेपाल टेलिकमको रोमिङ सेवा उपलब्ध थियो। हाल यो सेवा विश्वका विभिन्न प्रमुख गन्तव्यहरूमा विस्तार भइसकेको छ।

रोमिङ सेवा अन्तर्गत प्रयोगकर्ताले भ्वाइस, डाटा र एसएमएस सेवा प्रयोग गर्न सक्नेछन्। कम्पनीका अनुसार आगामी दिनमा थप देशहरूमा समेत सेवा विस्तार गर्ने योजना रहेको छ।

विदेश जाने वा बस्ने नेपालीहरूलाई लक्षित गर्दै प्रदान गरिएको यो सेवा निकै उपयोगी रहेको कम्पनीले जनाएको छ। प्रिपेड प्रयोगकर्ताका लागि भारत बाहेक अन्य देशमा रोमिङ सेवा स्वतः सक्रिय हुने व्यवस्था गरिएको छ भने भारतका लागि भने मोबाइलबाट विशेष कोड डायल गरी सेवा सक्रिय गर्नुपर्ने हुन्छ।

पोस्टपेड प्रयोगकर्ताका हकमा भने सेवा प्रयोग गर्न न्यूनतम पाँच हजार रुपैयाँ ब्यालेन्स आवश्यक पर्ने जनाइएको छ। विदेशमा रहँदा पनि इमेलमार्फत आवश्यक प्रक्रिया पूरा गरी रोमिङ सेवा सक्रिय गर्न सकिने सुविधा उपलब्ध छ।

रोमिङ सेवासम्बन्धी थप जानकारी वा गुनासोका लागि कम्पनीले इमेलमार्फत सम्पर्क गर्न अनुरोध गरेको छ।