हामी सबैकाे संसारन्यूज

काठमाडौं । महालक्ष्मी विकास बैंक ले ग्लोबल मनी विक २०२६ को अवसरमा देशभर वित्तीय साक्षरता तथा सचेतना कार्यक्रमहरु सम्पन्न गरेको छ। बैंकले २०८२ चैत २ गतेदेखि चैत ८ गतेसम्म साताव्यापी रूपमा सञ्चालन गरिएको अभियान अन्तर्गत वित्तीय पहुँच बाहिर रहेका लक्षित वर्गलाई केन्द्रित गरी विभिन्न कार्यक्रम आयोजना गरेको जनाएको छ।

बैंकका अनुसार देशभर रहेका शाखा कार्यालय तथा प्रादेशिक कार्यालयमार्फत दरबारमार्ग, हेटौंडा, इटहरी, भैरहवा, पोखरा, वीरगञ्ज, धनगढी, डडेलधुरा, लहान लगायतका स्थानमा विद्यार्थी तथा युवालाई लक्षित गरी वित्तीय साक्षरता अभिवृद्धि कार्यक्रम सञ्चालन गरिएको थियो। “स्मार्ट मनी टक्स” भन्ने मूल नारासहित सञ्चालन गरिएका कार्यक्रमहरुमा एक हजारभन्दा बढीको सहभागिता रहेको जनाइएको छ।

उक्त कार्यक्रमहरुमा बचत, कर्जा, लगानी, विद्युतीय वित्तीय सेवा, विप्रेषण, बीमा, जोखिम व्यवस्थापन, वित्तीय अनुशासन तथा वित्तीय ठगी सम्बन्धी विषयमा जानकारी प्रदान गरिएको बैंकले जनाएको छ। साथै नेपाल राष्ट्र बैंक लगायतका संस्थाहरुको सहकार्यमा आयोजित प्रभातफेरी तथा सचेतनामूलक कार्यक्रमहरुमा समेत बैंकले सक्रिय सहभागिता जनाएको थियो।

यसै अवसरमा बैंकको नेपालगञ्ज शाखाले बाँकेको एक विद्यालयमा अध्ययनरत विद्यार्थीहरुलाई शैक्षिक सामग्री वितरण गरेको जनाएको छ। साथै सामाजिक सञ्जालमार्फत पनि विभिन्न सचेतनामूलक सामग्री तथा भिडियो प्रसारण गरी वित्तीय शिक्षाको महत्वबारे जनचेतना फैलाउने प्रयास गरिएको बैंकले उल्लेख गरेको छ।

“सबल बैंक, सफल सहकार्य” भन्ने नारालाई आत्मसात गर्दै विगत ३१ वर्षदेखि सेवा दिँदै आएको बैंकका देशभर १०३ शाखा र करिब ८ लाख ५० हजार ग्राहक रहेको जनाइएको छ।