हामी सबैकाे संसारन्यूज

काठमाडौं । प्रभु बैंक लिमिटेड ले ‘ग्लोबल मनी विक–२०२६’ को अवसरमा देशव्यापी रूपमा सञ्चालन गरेको वित्तीय साक्षरता कार्यक्रम सम्पन्न गरेको छ। “स्मार्ट मनी टक्स” भन्ने मूल नाराका साथ २०८२ चैत २ गतेदेखि सुरु भएको कार्यक्रम चैत ८ गते सम्पन्न भएको बैंकले जनाएको छ।

बैंकका अनुसार सातै प्रदेशमा रहेका २०० भन्दा बढी शाखा कार्यालयमार्फत साताव्यापी अभियान सञ्चालन गर्दै वित्तीय साक्षरता, बालबालिका तथा युवालक्षित सचेतनामूलक कार्यक्रम र प्रभातफेरी आयोजना गरिएको थियो।

उक्त कार्यक्रमहरुमा समुदाय, महिला, बालबालिका तथा विद्यालय र कलेजका विद्यार्थीलाई लक्षित गरी आधुनिक बैंकिङ, बचत, ऋण, लगानी, विद्युतीय बैंकिङ सेवा तथा त्यससँग सम्बन्धित सावधानीका विषयमा जानकारी प्रदान गरिएको बैंकले जनाएको छ। साथै डिजिटल माध्यममार्फत हुने ठगीबाट जोगिन अज्ञात स्रोतका लिंक नखोल्न, संवेदनशील विवरण साझा नगर्न समेत सचेतना फैलाइएको छ।

संस्थागत सामाजिक उत्तरदायित्व अन्तर्गत सञ्चालन गरिएको कार्यक्रममा वाग्मती प्रदेशका ४७, गण्डकीका ५२, लुम्बिनीका १६, कोशीका ३९, मधेशका २९, कर्णालीका १४ तथा सुदूरपश्चिमका १९ शाखाबाट सहभागिता जनाइएको बैंकले जनाएको छ।

बैंकले आफ्ना सामाजिक सञ्जालमार्फत समेत वित्तीय सचेतनासम्बन्धी सामग्री तथा सन्देशहरू प्रवाह गर्दै आएको जनाएको छ। हाल बैंकका देशभर ३१२ शाखा कार्यालय, २८५ एटीएम र ६८ एक्सटेन्सन काउन्टरमार्फत करिब ३६ लाखभन्दा बढी ग्राहकलाई सेवा प्रदान गर्दै आएको छ।

“विश्वास लिन्छौं, विश्वास दिन्छौं” भन्ने नारासहित बैंकले अत्याधुनिक प्रविधिमार्फत गुणस्तरीय सेवा प्रवाह गर्दै प्रतिस्पर्धात्मक रूपमा अगाडि बढिरहेको जनाएको छ।