हामी सबैकाे संसारन्यूज

काठमाडौं । Vaidya Organization of Industries & Trading Houses ले इटालियन प्रिमियम मोटरसाइकल ब्रान्ड Morbidelli लाई नेपाली बजारमा आधिकारिक रूपमा भित्र्याएको घोषणा गरेको छ। दुईपांग्रे सवारी क्षेत्रमा आफ्नो उपस्थिति बलियो बनाउने रणनीतिअन्तर्गत कम्पनीले यो साझेदारी अघि बढाएको हो।

करिब पाँच दशक लामो अनुभव बोकेको वैद्य अर्गनाइजेशनले नेपालमा Toyota गाडीको आधिकारिक वितरण गर्दै विश्वासिलो पहिचान बनाएको छ। पछिल्ला वर्षहरूमा कम्पनीले दुईपांग्रे क्षेत्रमा पनि विस्तारलाई तीव्रता दिएको छ।

यसअघि कम्पनीले प्रिमियम इलेक्ट्रिक स्कुटर ब्रान्ड Ather लाई नेपाल भित्र्याएर सफलता हासिल गरिसकेको छ। एथरको सकारात्मक बजार प्रतिक्रिया पछि कम्पनीले अब प्रिमियम मोटरसाइकल सेग्मेन्टमा थप सशक्त उपस्थिति जनाउने लक्ष्य राखेको छ।

इटालीको प्रतिष्ठित ब्रान्ड मोर्बिडेली प्रिमियम डिजाइन, शक्तिशाली इन्जिन र रेसिङ हेरिटेजका लागि विश्वभर परिचित मानिन्छ। कम्पनीका अनुसार यस ब्रान्डले नेपाली युवा तथा बाइक पारखीलाई उच्चस्तरीय राइडिङ अनुभव प्रदान गर्ने अपेक्षा गरिएको छ।

मोर्बिडेलीमार्फत प्रिमियम सेग्मेन्टमा नयाँ मापदण्ड स्थापित गर्ने लक्ष्यसहित वैद्य अर्गनाइजेशनले निकट भविष्यमा विभिन्न मोडेल सार्वजनिक गर्दै देशव्यापी सञ्जाल विस्तार गर्ने योजना बनाएको छ।

मोर्बिडेली विश्वव्यापी रूपमा Keeway Group अन्तर्गत सञ्चालन हुने ब्रान्ड हो, जसअन्तर्गत Benelli लगायतका अन्तर्राष्ट्रिय मोटरसाइकल ब्रान्डहरू समेत रहेका छन्।