Sansar News
भक्तपुर । आठ रात नौ दिन लामो भक्तपुरको प्रसिद्ध बिस्केट (बिस्काः) जात्रा शान्तिपूर्ण रूपमा सम्पन्न गर्न सम्पूर्ण सरोकारवाला सहमत भएका छन् ।
भक्तपुर नगरपालिकाका प्रमुख सुनिल प्रजापतिको अध्यक्षतामा आज बसेको बैठकले प्रसिद्ध बिस्केट जात्रा सभ्य, भव्य र शान्तिपूर्ण तरिकाले सम्पन्न गर्ने निर्णय गरेको छ । सो बैठकमा जिल्ला प्रशासन कार्यालय, गुठी संस्थान, भक्तपुर नगरपालिकालगायतका सरोकारवाला निकाय निर्णयमा सहमत भएका हुन् ।
प्रमुख जिल्ला अधिकारी उमेशकुमार ढकालले सबैको साझा ऐतिहासिक बिस्का जात्रालाई शान्तिपूर्ण रूपमा सम्पन्न गर्न सबैले आफ्नो क्षेत्रबाट सहयोगी भूमिका निर्वाह गर्नुपर्ने बताए ।
गुठी संस्थान भक्तपुरका प्रमुख आनन्द कर्माचार्यले बिस्का जात्राको हालसम्मको तयारीबारे जानकारी गराउँदै भैरब र भद्रकालीको रथ निर्माण जारी रहेको, रथ तान्ने डोरीलगायत बली दिने बोकासहितको ठेक्का लगाइ सकिएको तथा जात्रा सम्पन्न गर्न करिब ३० लाख रुपैयाँ लाग्ने अनुमान गरिएको जानकारी दिए ।
जात्रा यही चैत २७ गते सुरु भई आगामी वैशाख ५ गते सम्पन्न हुने जनाइएको छ ।
वि.सं.२०८२ चैत १२ बिहीवार १३:३२ मा प्रकाशित
