हामी सबैकाे संसारन्यूज

विराटनगर, । सुनसरीको दक्षिणी क्षेत्र देवानगञ्जमा भएको घटनापछि उत्पन्न विवाद र तनाव पूर्ण रूपमा साम्य हुन नसकेपछि जिल्ला प्रशासन कार्यालय सुनसरीले पुनः अनिश्चितकालीन कर्फ्यु आदेश जारी गरेको छ।

प्रमुख जिल्ला अधिकारी ईश्वरीप्रसाद अर्यालले जारी गरेको विज्ञप्तिअनुसार सोमबार अपराह्न ३ बजेदेखि अर्को सूचना जारी नभएसम्म लागू हुने गरी कर्फ्यु आदेश जारी गरिएको हो।

स्थानीय प्रशासन ऐन, २०२८ को दफा ६(क) बमोजिम जारी आदेशअनुसार कर्फ्यु अवधिभर तोकिएको क्षेत्रभित्र सर्वसाधारणको आवतजावत, भेला, जुलुस, प्रदर्शन, सभा, बैठक तथा घेराउलगायतका गतिविधि पूर्ण रूपमा निषेध गरिएको छ।

प्रशासनका अनुसार कर्फ्यु क्षेत्र पूर्वमा पकली चोक, पश्चिममा कोशी ब्यारेजको पुल तथा उत्तर र दक्षिणतर्फ महेन्द्रराजमार्गको दुवैतर्फ २०० मिटर क्षेत्रसम्म कायम गरिएको छ। यसमा इनरुवा बजार क्षेत्रसमेत समेटिएको छ।

देवानगञ्जमा भएको घटनापछि उत्पन्न संवेदनशील अवस्थालाई मध्यनजर गर्दै शान्ति–सुरक्षा कायम राख्न र सम्भावित अप्रिय घटना रोक्न कर्फ्यु आदेश जारी गरिएको प्रशासनले जनाएको छ।