हामी सबैकाे संसारन्यूज

काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछानेविरुद्धको मुद्दा संशोधन गर्ने निर्णयविरुद्ध परेको रिट निवेदनको सुनुवाइ बिहीबार स्थगित भएको छ ।

महान्यायाधिवक्ता कार्यालयले सुनुवाइ स्थगित गर्न दिएको निवेदनका आधारमा आजका लागि तय भएको पेसी प्रभावित भएको हो । सर्वोच्च अदालतका न्यायाधीशहरू नृपध्वज निरौला, नित्यानन्द पाण्डेय र श्रीकान्त पौडेलको पूर्ण इजलासमा उक्त मुद्दाको पालो परेको थियो ।

यसअघि, मुद्दा संशोधनको निर्णयमाथि सर्वोच्चमा तीनवटा छुट्टाछुट्टै रिट निवेदन दर्ता भएका थिए। उक्त निवेदनहरूमाथि प्रारम्भिक सुनुवाइ गर्दै संयुक्त इजलासका दुई न्यायाधीशहरूले गम्भीर कानुनी प्रश्न विद्यमान रहेको ठहर गरेका थिए। सोही बमोजिम मुद्दालाई तीन सदस्यीय पूर्ण इजलासमा पेस गर्न आदेश दिइएको थियो।

पूर्ण इजलासमा पठाइएपछि सर्वोच्चले बिहीबारका लागि पहिलोपटक सुनुवाइको मिति तय गरेको भए तापनि सरकारी पक्षको अनुरोधमा सुनुवाइ अघि बढ्न सकेन। अब यो मुद्दाको अर्को सुनुवाइ अदालतले पुनः तोक्ने मितिमा हुनेछ।