हामी सबैकाे संसारन्यूज

काठमाडौं । ज्योति समूहअन्तर्गतको श्याकर ट्रेडिङ कम्पनीले हुन्डाई सवारी साधनका ग्राहकलाई लक्षित गर्दै देशभर सेवा विस्तार अभियान अघि बढाएको छ। यसै क्रममा कम्पनीले काठमाडौंमा दुई वटा प्रिमियम सर्भिस सेन्टरको औपचारिक उद्घाटन गरेको छ।

कम्पनीले पहिलो चरणमा ६ वटा अत्याधुनिक सेवा केन्द्र सञ्चालनमा ल्याउने योजना अघि सारेको छ। सोही योजनाअन्तर्गत टेकुबाट स्थानान्तरण गरिएको सेवा केन्द्र त्रिपुरेश्वरमा र कान्तिपथस्थित ज्योति भवनमा अर्को सेवा केन्द्र सञ्चालनमा आएको हो।

उद्घाटन समारोहमा हुन्डाई मोटर कम्पनी लिमिटेडका एशिया र ओसियाना क्षेत्रका प्रतिनिधि, क्षेत्रीय अपरेसन प्रमुख तथा एसोसिएटेड क्षेत्रीय प्रतिनिधिहरूको उपस्थिति रहेको थियो। साथै, एशियन मोटर कम्पनीका प्रमुख कार्यकारी अधिकृत तोसियो कुवाहारा, श्याकर ट्रेडिङका अध्यक्ष सौरभ ज्योति र उपाध्यक्ष सुद ज्योति पनि कार्यक्रममा सहभागी थिए।

कम्पनीले ‘प्रीमियम सर्भिस एट फर्स्ट प्राइस’ अवधारणाअन्तर्गत ग्राहकलाई उचित मूल्यमा उच्चस्तरीय सेवा दिने लक्ष्य लिएको जनाएको छ।

कम्पनीका अनुसार सेवा केन्द्रहरूमा आधुनिक डायग्नोस्टिक उपकरण, डिजिटल सर्भिस ट्र्याकिङ प्रणाली, दक्ष प्राविधिक सेवा तथा छिटो सेवा प्रवाहका लागि फास्ट सर्भिस बेजस्ता सुविधा उपलब्ध हुनेछन्।

त्यसैगरी, 3S (सेल्स, सर्भिस र स्पेयर पार्ट्स) सेवा एकै स्थानमा उपलब्ध गराइने, ग्राहकका लागि निःशुल्क कार वाश तथा कफी सुविधा समेत व्यवस्था गरिएको कम्पनीले जनाएको छ।

श्याकर ट्रेडिङले यस विस्तारमार्फत नेपालभर हुन्डाई ग्राहकलाई अन्तर्राष्ट्रिय स्तरको सेवा अनुभव प्रदान गर्ने लक्ष्य लिएको छ। आगामी दिनमा थप सेवा केन्द्र विस्तार गर्दै सेवा सञ्जाल अझ सुदृढ बनाइने कम्पनीको भनाइ छ।