हामी सबैकाे संसारन्यूज

काठमाडौं । नेपालमा संचालमा रहेका जीवन बीमा कम्पनीहरूले चालू आर्थिक वर्ष २०८२/८३ को चैत मसान्तसम्ममा उत्साहजनक व्यापार गरेका छन् । नेपाल बीमा प्राधिकरणको पछिल्लो तथ्याङ्कअनुसार नेपालमा हाल संचालनमा रहेका १४ जीवन बीमा कम्पनी, तीन लघु बीमा र वैदेशिक रोजगार म्यादी बीमा गरी कुल १ खर्ब ४३ अर्ब ८१ करोड १ लाख रुपैयाँ बराबरको उक्त बीमा शुल्क संकलन गरेका हुन् ।

नेपाल लाइफको लोभलाग्दो व्यापार

तथ्याङ्क अनुसार नेपाल लाइफ इन्स्योरेन्सले आफ्नो बजार वर्चस्वलाई झन् बलियो बनाएको छ । यस अवधिमा कम्पनीले कुल ३६ अर्ब ८६ करोड १९ लाख रुपैयाँ बराबरको बीमाशुल्क संकलन गर्दै पहिलो स्थान ओगटेको छ । दोस्रो स्थानमा रहेको नेशनल लाइफ इन्स्योरेन्स कम्पनीले १७ अर्ब ७ करोड ९४ लाख रुपैयाँ संकलन गरेको छ भने लाइफ इन्स्योरेन्स कर्पोरेशन (नेपाल) १५ अर्ब १७ करोड ८ लाख रुपैयाँ प्रिमियम संकलन गर्दै तेस्रो स्थानमा रहेको छ ।

बीमा कम्पनीहरुको मुख्य तथ्याङ्कीय विवरण

चालु आर्थिक वर्षको ९ महिनामा जीवन बीमा कम्पनीहरूले कुल ३५ अर्ब १५ करोड ६५ लाख रुपैयाँ बराबरको नयाँ प्रिमियम संकलन गरेका छन् भने उनीहरुको व्यवसायको मुख्य हिस्साको रुपमा रहेको नविकरणवापतको शुल्क १ खर्ब ८ अर्ब ६५ करोड ३६ लाख रुपैयाँ रहेको छ । त्यस्तै यो अवधिमा नेपालमा कुल १ करोड ६३ लाख ९७ हजार २०५ सक्रिय बीमालेखहरू रहेका छन् ।

लघु बीमा र म्यादी बीमाको अवस्था पनि उत्साहजनक

लघु जीवन बीमातर्फ तीनवटा कम्पनीले कुल ४ करोड ५६ लाख रुपैयाँको व्यवसाय गरेका छन् । त्यस्तै, वैदेशिक रोजगार म्यादी जीवन बीमाबाट मात्रै २ अर्ब ५० करोड ७५ लाख रुपैयाँ संकलन भएको तथ्याङ्क छ । सरकारी स्वामित्वको राष्ट्रिय जीवन बीमा कम्पनीले पनि यो अवधिमा ९ अर्ब ११ करोड ८३ लाख रुपैयाँको व्यवसाय गरेको देखिएको छ ।

याे पनि हेर्नुहाेस्

बीमा व्यवसायको प्रादेशिक अवस्था बागमती प्रदेशको हिस्सा ४४ प्रतिशत, कर्णाली अझै पछि

बीमा व्यवसायको प्रादेशिक अवस्था बागमती प्रदेशको हिस्सा ४४ प्रतिशत, कर्णाली अझै पछि