हामी सबैकाे संसारन्यूज

स्याङ्जा । स्याङ्जाकाे अर्जुनचौपारी गाउँपालिका ले अत्यधिक भार बोकेर सञ्चालन हुने सवारी साधनमाथि रोक लगाएको छ। गाउँपालिकाको कार्यालयले एक सूचना जारी गर्दै  मुख्य तथा सहायक सडकखण्डहरूमा क्षमताभन्दा बढी भार बोकेका सवारी साधनका कारण सडकमा क्षति पुग्नुका साथै दुर्घटनाको जोखिम बढेको भन्दै यस्तो निर्णय गरिएको बताएकाे छ ।

गाउँपालिकाले मापदण्ड विपरित माल बाेकेका सवारी सडकमा गुड्दा पछिल्लो समय विभिन्न स्थानमा सडक भत्किने, खाल्डाखुल्डी बन्ने तथा सवारी आवागमनमा अवरोध सिर्जना हुने समस्या बढ्दै गएको जनाएको छ। विशेषगरी भारी सवारी साधनले सडकको क्षमताभन्दा बढी भार बोक्दा सडक संरचना कमजोर बन्दै गएको उल्लेख गरिएको छ।

सूचनामा अब उप्रान्त सवारी साधनहरूले तोकिएको भार क्षमता ननाघी सञ्चालन गर्नुपर्ने स्पष्ट पारिएको छ। नियम उल्लंघन गर्ने सवारी चालक, व्यवसायी तथा सम्बन्धित निकायमाथि कानुनअनुसार कारबाही गरिने चेतावनी समेत दिइएको छ।

गाउँपालिकाले सबै सरोकारवालालाई जिम्मेवार भई सडकको दीगो संरक्षणमा सहयोग गर्न आग्रह गरेको छ।