Sansar News
काठमाडौँ । प्रतिनिधिसभाको आजको दोस्रो बैठकमा सङ्घीय संसद्को दुवै सदनको संयुक्त बैठकलाई सम्बोधनमार्फत सरकारको आगामी आर्थिक वर्षको नीति तथा कार्यक्रम प्रस्तुतिका लागि राष्ट्रपति रामचन्द्र पौडेलप्रति धन्यवाद प्रस्ताव पारित गरेको छ ।
सभामुख डोलप्रसाद अर्यालले धन्यवाद प्रस्ताव प्र्रस्तुत गर्दा बैठकले सर्वसम्मतिले पारित गरेको थियो । दुवै सदनको संयुक्त बैठक सकिएपछि भएको प्रतिनिधिसभा बैठकले सो प्रस्ताव पारित गरेको हो । बैठकमा प्रधानमन्त्री वालेन्द्र शाहले नीति तथा कार्यक्रमको प्रति टेबुल गरेका थिए ।
सभामुख अर्यालले आर्थिक वर्ष २०८३÷८४ को नीति तथा कार्यक्रममा छलफलमा उठेका विषयमाथि प्रधानमन्त्रीले यही वैशाख ३० गते जवाफ दिने कार्यक्रम तय भएको छ । छलफलमा दलीय प्रतिनिधित्वका आधारमा भाग लिन अर्काे बैठक अगावै नाम दिनुपर्ने र विरोधको सूचना गर्ने सदस्यले वैशाख २९ गते दिउँसो २ बजेभित्र दिइसक्नुपर्ने छ ।
बैठकमा नेकपा एमालेका गुरुप्रसाद बरालले राष्ट्रपति पौडेलले नीति तथा कार्यक्रम प्रस्तुत गर्ने संयुक्त बैठकमा प्रधानमन्त्री शाहले राष्ट्रिय पोसाक नलगाएको र संसदीय मर्यादा पालना नगरेको भनी ध्यानाकर्षण गराएका थिए । प्रतिनिधिसभाको अर्काे बैठक यही वैशाख २९ गते मङ्गलबार दिउँसो १ः०० बजे बस्नेछ । सङ्घीय संसद्को बजेट अधिवेशन आजैबाट सुरु भएको हो ।
वि.सं.२०८३ वैशाख २८ सोमवार १८:४४ मा प्रकाशित
