Sansar News
नवलपुर । माध्यमिक शिक्षा परीक्षा (SEE) २०८२ मा देवचुली नगरपालिका अन्तर्गतका विभिन्न विद्यालयबाट सहभागी भएका ५ जना विद्यार्थीले ४ GPA हासिल गर्दै उत्कृष्ट नतिजा ल्याएका छन् । नगरपालिकाले उत्कृष्ट नतिजा ल्याउन सफल विद्यार्थीहरुलाई हार्दिक बधाई तथा शुभकामना व्यक्त गर्दै जनही नगद ३० हजार रुपैयाँसहित सम्मान गर्ने घोषणा गरेको छ ।
नगरपालिकाका अनुसार ४ GPA ल्याउन सफल विद्यार्थीहरुलाई निकट भविष्यमा भव्य समारोह आयोजना गरी सम्मान गरिनेछ । उत्कृष्ट नतिजाले देवचुली नगरको शैक्षिक क्षेत्रलाई थप उर्जा र प्रेरणा प्रदान गरेको नगरपालिकाको भनाइ छ ।
नगरपालिकाले SEE परीक्षामा सफलता हासिल गर्न विद्यार्थीहरुको मेहनतसँगै विद्यालय, शिक्षक तथा अभिभावकको महत्वपूर्ण भूमिका रहेको उल्लेख गर्दै सम्बन्धित सबैप्रति आभार व्यक्त गरेको छ । “विद्यार्थीहरुको निरन्तर मेहनत, शिक्षकहरुको मार्गदर्शन तथा अभिभावकको साथ–सहयोगकै कारण यस्तो गौरवपूर्ण नतिजा सम्भव भएको हो,” नगरपालिकाले जनाएको छ ।
यस वर्ष ४ GPA हासिल गर्ने विद्यार्थीहरुमा श्री नेपाल माध्यमिक विद्यालय का आर्जन अधिकारी, श्री सकलादेवी माध्यमिक विद्यालय का पवन भण्डारी, श्री वरचुली माध्यमिक विद्यालय का आशिष घर्ती, श्री अमर ई. स्कुल का रिवाज भुजेल तथा श्री वाइज भिजन ई. स्कुल की पृस्किला बराम रहेका छन् ।
त्यसैगरी, अपेक्षाअनुसार नतिजा हासिल गर्न नसकेका विद्यार्थीहरुलाई निराश नहुन आग्रह गर्दै नगरपालिकाले SEE को नतिजाले मात्र जीवनको सफलता निर्धारण नगर्ने उल्लेख गरेको छ । आगामी दिनमा थप मेहनत, धैर्यता र आत्मविश्वासका साथ अघि बढे सफलताको नयाँ अवसर प्राप्त हुने विश्वास व्यक्त गरिएको छ ।
देवचुली नगरपालिकाले शिक्षा क्षेत्रको गुणस्तर अभिवृद्धिका लागि आगामी दिनमा समेत विद्यार्थी प्रोत्साहनका कार्यक्रमलाई निरन्तरता दिने जनाएको छ ।
वि.सं.२०८३ वैशाख ३१ बिहीवार १३:३२ मा प्रकाशित
