हामी सबैकाे संसारन्यूज

सुर्खेत । कर्णाली प्रदेश सरकारमा सहभागी नेपाली कांग्रेसका मन्त्रीहरूले सामूहिक राजीनामा दिएका छन् ।

केन्द्रमा विकसित नयाँ राजनीतिक समीकरण र प्रदेश तहमा गरिएको पूर्वसहमति बमोजिम नयाँ सरकार गठनको बाटो खोल्न कांग्रेसका चारै जना मन्त्रीहरूले बुधबार बिहान मुख्यमन्त्री यामलाल कँडेलसमक्ष सामूहिक राजीनामा बुझाएका हुन् ।

सरकारबाट बाहिरिने मन्त्रीहरूमा आर्थिक मामिला तथा योजनामन्त्री राजीवविक्रम शाह, सामाजिक विकासमन्त्री घनश्याम भण्डारी, उद्योग, पर्यटन, वन तथा वातावरणमन्त्री सुरेश अधिकारी र ऊर्जा तथा जलस्रोत विकासमन्त्री विजया बुढा हुनुहुन्छ। उहाँहरू वि.सं. २०८१ साउनमा कँडेल नेतृत्वको सरकारमा सहभागी हुनुभएको थियो। राजीनामा पश्चात् सामाजिक विकासमन्त्री भण्डारीले मुख्यमन्त्रीलाई भेटेरै राजीनामा पत्र बुझाइएको र जनसरोकारका कामलाई गति दिँदै नयाँ प्रक्रियाका लागि मार्गप्रशस्त गरिएको जानकारी दिए ।

राजीनामा दिनुअघि बुधबार बिहानका लागि बोलाइएको मन्त्रिपरिषद् बैठक कांग्रेसका मन्त्रीहरूले बहिष्कार गरेका थिए। बैठक सुरु हुनु अगावै मुख्यमन्त्री कार्यालय पुगेका वनमन्त्री अधिकारी र सामाजिक विकासमन्त्री भण्डारी बैठकमा सहभागी नभई राजीनामा बुझाएर बाहिरिनुभएको थियो। आर्थिक मामिलामन्त्री शाह हाल वैदेशिक भ्रमणमा रहेका छ भने ऊर्जामन्त्री बुढा पनि बैठकमा उपस्थित थिए ।

हाल कर्णाली प्रदेशमा नेपाली कांग्रेस र नेकपा (एमाले) को संयुक्त गठबन्धन सरकार क्रियाशील छ, जसमा एमालेबाट मुख्यमन्त्री कँडेलसहित दुई मन्त्री र एक राज्यमन्त्री रहनुभएको छ। दुई दलबीच सरकारको नेतृत्व आलोपालो सञ्चालन गर्ने आन्तरिक समझदारी बनेको थियो। पार्टीभित्र मन्त्रीहरूको कार्यसम्पादनलाई लिएर उठिरहेका प्रश्नहरू र सरकार सञ्चालनको पूर्वसहमति कार्यान्वयन गर्ने चरण आएकाले कांग्रेसले सरकारबाट बाहिरिने निर्णय लिएको बुझिएको छ। कांग्रेसको यो कदमसँगै कर्णालीमा नयाँ सरकार गठनको प्रक्रिया सुरु हुने देखिन्छ ।