Sansar News
काठमाडौं । लगातारको वर्षापछि काठमाडौंस्थित बागमती नदीको बहाव सतर्कता तहभन्दा माथि पुगेको छ। जल तथा मौसम विज्ञान विभागले नदी किनार तथा डुबानको जोखिम रहेका क्षेत्रमा बसोबास गर्ने नागरिकलाई सोमबार बिहानसम्म उच्च सतर्कता अपनाउन आग्रह गरेको छ।
विभागका अनुसार गौरीघाट जलमापन केन्द्रमा आइतबार साँझ बागमती नदीको पानीको सतह २।४१ मिटर पुगेको छ। उक्त केन्द्रमा २।१० मिटरलाई सतर्कता तह मानिन्छ भने २।७० मिटर पुगेपछि खतरा तह पुगेको मानिने विभागले जनाएको छ।
जल तथा मौसम विज्ञान विभागका बाढीविद् विनोद पराजुलीका अनुसार नदीको बहाव अझै बढ्दो क्रममा रहेकाले जोखिम यथावत् रहेको छ।
‘हाल बागमती नदीले गौरीघाट क्षेत्रमा सतर्कता तह पार गरिसकेको छ। नदी आसपासका डुबान हुने स्थानका बासिन्दाले सोमबार बिहानसम्म उच्च सतर्कता अपनाउन आवश्यक छ,’ उनले भने।
विभागले विशेषगरी नदी किनार, तल्लो तटीय क्षेत्र तथा हरेक वर्ष डुबान हुने बस्तीका नागरिकलाई अनावश्यक रूपमा नदी आसपास आवतजावत नगर्न, आवश्यक परे सुरक्षित स्थानमा सर्न तथा बाढी र पहिरोसम्बन्धी विभागबाट जारी हुने पछिल्ला सूचना तथा चेतावनीलाई नियमित रूपमा पालना गर्न अनुरोध गरेको छ।
मौसमविद्हरूले देशका विभिन्न स्थानमा अझै वर्षा जारी रहने सम्भावना रहेकाले नदी तथा खोलामा पानीको सतह थप बढ्न सक्ने चेतावनी दिएका छन्। त्यसैले स्थानीय प्रशासन, सुरक्षा निकाय र नागरिकलाई आवश्यक सतर्कता अपनाउन विभागले पुनः आग्रह गरेको छ।
वि.सं.२०८३ साउन ३ आइतवार १९:१२ मा प्रकाशित
