हामी सबैकाे संसारन्यूज

बागलुङ। बागलुङको ढोरपाटन नगरपालिका–९ स्थित सुकुरदुङमा बिहान १० बजेतिर सडक माथिबाट खसेको पहिरोले पर्यटक बोकेको स्कर्पियो पुरिएको छ ।

जिल्ला प्रहरी कार्यालय बागलुङका अनुसार बागलुङ बजार साल्झण्डी–ढोरपाटन सडकबाट ढोरपाटनतर्फ जाँदै गरेको ग १ य ९८२ नम्बरको स्कर्पियो मध्यपहाडी लोकमार्गअन्तर्गत एक पहिरो प्रभावित क्षेत्रमा पुगेका बेला माथिबाट खसेको ढुंगा–माटोसहितको पहिरोले गाडी पुरेको हो।

घटनापछि स्थानीयवासी, प्रहरी र सडक डिभिजन कार्यालयको टोली उद्धार तथा सडक खुलाउने कार्यमा खटिएको छ। गाडीमा सवार यात्रुको संख्या र मानवीय क्षतिको विवरण भने तत्काल प्राप्त हुन सकेको छैन।

लगातारको वर्षासँगै बागलुङ–ढोरपाटन सडकखण्डका विभिन्न स्थानमा पहिरो खस्ने क्रम जारी रहेकाले अत्यावश्यक कामबाहेक यात्रा नगर्न र यात्रा गर्दा उच्च सतर्कता अपनाउन प्रशासनले अनुरोध गरेको छ।