हामी सबैकाे संसारन्यूज

काठमाडौं । सामाजिक सुरक्षा कोषले आफ्ना योगदानकर्तालाई स्वास्थ्य सेवा प्राप्त गर्दा कोषले तोकेको प्रक्रिया अनिवार्य रूपमा पालना गर्न आग्रह गरेको छ। कोषले औषधि उपचार, स्वास्थ्य तथा मातृत्व योजना तथा दुर्घटना एवं अशक्तता सुरक्षा योजना अन्तर्गतका सेवामा सहज पहुँच सुनिश्चित गर्न यस्तो सूचना जारी गरेको हो।

कोषका अनुसार स्वास्थ्य उपचार सेवा लिन योगदानकर्ताले कोषसँग सम्झौता भएका अस्पतालमा मात्र उपचार गराउनुपर्नेछ। यस्ता अस्पतालहरूको विवरण सामाजिक सुरक्षा कोषको वेबसाइटमा उपलब्ध रहेको जनाएको छ।

त्यस्तै, अस्पताल जानुअघि योगदानकर्ता, पति/पत्नी तथा छोराछोरीको KYC विवरण अद्यावधिक गर्नुपर्ने र उपचारका क्रममा सामाजिक सुरक्षा कोषले जारी गरेको परिचयपत्र (भौतिक वा भर्चुअल कार्ड) अनिवार्य रूपमा देखाउनुपर्ने व्यवस्था गरिएको उल्लेख छ।

कोषले सम्झौतामा आबद्ध अस्पतालहरूले कुनै पनि बहानामा विशेषज्ञ चिकित्सकबाट सेवा दिन अस्वीकार गर्ने, चिकित्सकले सिफारिस गरेका औषधि उपलब्ध नगराउने, शल्यक्रियामा अतिरिक्त शुल्क असुल्ने, ओपीडी सेवा समय घटाउने वा सामान्य बिरामी र कोषका लाभग्राहीबीच विभेदपूर्ण व्यवहार गरेमा तत्काल कोषलाई जानकारी गराउनसमेत आग्रह गरेको छ। गुनासा तथा जानकारीका लागि मोबाइल नम्बर ९८५१३४५८१४, कल सेन्टर १११६, इमेलस् claim@ssf.gov.np, ह्वाट्सएपस् ९८५१३४५८१४ तथा फोन नम्बर ०१–५३६०३१५ मार्फत सम्पर्क गर्न भनेकाे छ ।

सामाजिक सुरक्षा कोषले योगदानकर्ताले तोकिएको प्रक्रिया पालना गरेमा कोषले निर्धारण गरेको दररेटअनुसार सहज रूपमा स्वास्थ्य सेवा प्राप्त गर्न सक्ने जनाएको छ।