Sansar News
इनरुवा । जिल्ला प्रशासन कार्यालय सुनसरीले जिल्लाका विभिन्न क्षेत्रमा जारी गरिएको कर्फ्यु आदेश हटाएको छ। पछिल्लो समय सुरक्षा अवस्था क्रमशः सामान्य बन्दै गएपछि कर्फ्यु हटाइएको हो।
यद्यपी शुक्रबार बिहान ८ः३० बजेदेखि साँझ ५ बजेसम्मका लागि कर्फ्यु हटाइए पनि सुरक्षा संवेदनशीलतालाई मध्यनजर गर्दै १० स्थानीय तहमा निषेधाज्ञा जारी गरिएको छ।
प्रमुख जिल्ला अधिकारी इश्वरी प्रसाद अर्यालद्वारा जारी आदेशअनुसार स्थानीय प्रशासन ऐन, २०२८ को दफा ६ को उपदफा ३(क) बमोजिम सम्बन्धित क्षेत्रमा एकै स्थानमा पाँच जनाभन्दा बढी मानिस भेला हुन, जुलुस, प्रदर्शन, सभा, बैठक तथा घेराउ गर्न निषेध गरिएको छ।
निषेधाज्ञा लागू गरिएका क्षेत्रमा इटहरी उपमहानगरपालिका–१६ र १७ अन्तर्गत महेन्द्र राजमार्गको दायाँ–बायाँ २०० मिटर क्षेत्र, रामधुनी नगरपालिका–१ र ५ अन्तर्गत महेन्द्र राजमार्गको दायाँ–बायाँ २०० मिटर क्षेत्र, इनरुवा नगरपालिका, दुहबी नगरपालिका, भोक्राहा नरसिंह गाउँपालिका, कोशी गाउँपालिका, गढी गाउँपालिका, देवानगञ्ज गाउँपालिका, हरिनगर गाउँपालिका तथा बर्जु गाउँपालिकाको सम्पूर्ण क्षेत्र रहेका छन्।
जिल्ला प्रशासन कार्यालयले पछिल्लो सुरक्षा अवस्थाको समीक्षा गर्दै कर्फ्यु हटाइएको भए पनि शान्ति–सुरक्षा कायम राख्न र सम्भावित अप्रिय घटना रोक्न संवेदनशील क्षेत्रमा निषेधाज्ञा जारी गरिएको जनाएको छ। प्रशासनले सर्वसाधारणलाई कानुनको पूर्ण पालना गर्न, अफवाहमा विश्वास नगर्न तथा सामाजिक सद्भाव कायम राख्न सहयोग गर्न आग्रह गरेको छ।
वि.सं.२०८३ साउन १६ शनिवार १२:५८ मा प्रकाशित
