हामी सबैकाे संसारन्यूज

काठमाडौं । सरकारले चालु आर्थिक वर्ष २०८३/०८४ को बजेटमार्फत घोषणा गरिएको तलब वृद्धिअनुसार राष्ट्रसेवक कर्मचारीहरूको नयाँ तलबमान स्वीकृत गरेको छ ।

अर्थ मन्त्रालयको प्रस्तावमा मन्त्रिपरिषद्को बैठकले साउन १ गतेदेखि लागू हुने गरी निजामती कर्मचारी, नेपाली सेना, नेपाल प्रहरी, सशस्त्र प्रहरी बल, स्वास्थ्य सेवा, संसद् सेवा, सामुदायिक विद्यालयका शिक्षक तथा प्रदेश र स्थानीय तहका कर्मचारीहरूको नयाँ तलबमान तथा सुविधा स्वीकृत गरेको हो ।

नयाँ तलबमानअनुसार सबैभन्दा धेरै तलब थाप्नेमा राज्यको प्रशासनिक संयन्त्रको सर्वाेच्च पद मुख्यसचिव र नेपाली सेनाका प्रधानसेनापति छन् । उनीहरुको नयाँ मासिक तलब ९० हजार ५९४ रुपैयाँ पुगेको छ । यसअघि उनीहरूको सुरु तलबमान ८४ हजार ९३२ रुपैयाँ रहेको थियो ।

त्यस्तै, नेपाल प्रहरीका महानिरीक्षक (आईजीपी), सशस्त्र प्रहरी बलका महानिरीक्षक (एआईजीपी) तथा नेपाल सरकारका सचिवको मासिक तलब ८४ हजार ५७६ रुपैयाँ कायम गरिएको छ ।

सरकारी सेवामा सबैभन्दा कम तलब पाउने प्रथमस्तरका कार्यालय सहयोगी  छन् । उनीहरुको कुल मासिक तलब २८ हजार ९८४ रुपैयाँ पुगेको छ ।

श्रेणीविहीन कर्मचारी (हल्कारा, हुलाकी तथा कार्यालय सहयोगी) को सुरु तलबमान २७ हजार १७२ रुपैयाँ रहेकामा ग्रेड रकम थपिएपछि कुल तलब २८ हजार ९८४ रुपैयाँ पुगेको हो ।

सरकारले नयाँ तलबमानसँगै कर्मचारीहरूलाई १० प्रतिशत मासिक प्रोत्साहन भत्ता पनि उपलब्ध गराउने व्यवस्था गरेको छ ।

अर्थ मन्त्रालयका अनुसार एक दिनको तलब बराबरको ग्रेड रकम र वृद्धि पश्चात् कायम हुने तलबमानको १० प्रतिशत रकम मासिक रूपमा प्रोत्साहन भत्ताका रूपमा प्रदान गरिनेछ ।

त्यस्तै सरकारले अवकाशप्राप्त कर्मचारीहरूको पेन्सन रकममा पनि १० प्रतिशत वृद्धि गर्ने निर्णय गरेको छ ।