हामी सबैकाे संसारन्यूज

काठमाडाँ । सरकारले चालु आर्थिक वर्षको पहिलो त्रैमास अर्थात् असोजसम्म १ खर्ब रुपैयाँ आन्तरिक ऋण उठाउने भएको छ। सार्वजनिक ऋण व्यवस्थापन कार्यालयले सार्वजनिक गरेको ऋण उठाउने तालिकाअनुसार सरकारले चालु आर्थिक वर्षभरि ४ खर्ब १० अर्ब रुपैयाँ आन्तरिक ऋण उठाउने लक्ष्य राखेको छ।

सार्वजनिक ऋण व्यवस्थापन कार्यालयका अनुसार चालु आर्थिक वर्षको पहिलो त्रैमास (साउन–असोज) मा सरकारले ट्रेजरी बिलमार्फत १० अर्ब र विकास ऋणपत्रमार्फत ९० अर्ब गरी जम्मा १ खर्ब रुपैयाँ ऋण उठाउनेछ।

त्यस्तै, दोस्रो त्रैमास (कात्तिक–पुस) मा ट्रेजरी बिलमार्फत १० अर्ब, विकास ऋणपत्रमार्फत ८० अर्ब, नागरिक बचतपत्रमार्फत २ अर्ब ५० करोड र वैदेशिक रोजगार बचतपत्रमार्फत ५० करोड गरी कुल ९३ अर्ब रुपैयाँ ऋण उठाइनेछ।

तेस्रो त्रैमास (माघ–चैत) मा ट्रेजरी बिलमार्फत ३० अर्ब र विकास ऋणपत्रमार्फत ९० अर्ब गरी १ खर्ब २० अर्ब रुपैयाँ ऋण परिचालन गरिनेछ।

चौथो त्रैमास (बैशाख–असार) मा ट्रेजरी बिलमार्फत ५४ अर्ब, विकास ऋणपत्रमार्फत ४० अर्ब, नागरिक बचतपत्रमार्फत २ अर्ब ५० करोड र वैदेशिक रोजगार बचतपत्रमार्फत ५० करोड गरी कुल ९७ अर्ब रुपैयाँ ऋण उठाउने सरकारको तयारी छ।

यसरी सरकारले ब्याजदर तुलनात्मक रूपमा अनुकूल रहेको समयमा ठूलो परिमाणमा आन्तरिक ऋण परिचालन गर्न लागेको देखिन्छ। यद्यपि, बढ्दो सार्वजनिक ऋणसँगै यसको ब्याज तथा साँवा भुक्तानीको दायित्व पनि बढ्ने भएकाले ऋणको सदुपयोग र उत्पादनमूलक क्षेत्रमा लगानी गर्नुपर्ने चुनौती सरकारसामु रहेको छ।

विगतका वर्षहरूको तुलनामा अहिले आन्तरिक ऋणको ब्याजदर उल्लेख्य रूपमा घटेको छ। नेपाल राष्ट्र बैंकको लचिलो मौद्रिक नीति तथा बैंकिङ प्रणालीमा रहेको अधिक तरलताका कारण सरकारलाई कम ब्याजदरमा ऋण परिचालन गर्न सहज भएको हो।