हामी सबैकाे संसारन्यूज

नयाँ दिल्ली । भारतस्थित नेपाली राजदूतावासले भारतका विभिन्न राज्य तथा केन्द्रशासित प्रदेशमा अध्ययनरत नेपाली विद्यार्थीहरूलाई लक्षित गर्दै “आफ्नो दूतावास चिनौंः नेपाली विद्यार्थी सम्पर्क कार्यक्रम २०२६” मा सहभागिताका लागि आवेदन आह्वान गरेको छ।

नेपाली राजदूतावास, नयाँ दिल्लीले १० अगस्ट २०२६ मा सूचना जारी गर्दै भारतका विभिन्न शैक्षिक संस्थामा अध्ययनरत नेपाली विद्यार्थीलाई सक्रिय रूपमा कार्यक्रममा सहभागी हुन आह्वान गरेको हो।

दिल्ली–एनसीआर बाहेक भारतका विभिन्न राज्य तथा केन्द्रशासित प्रदेशमा रहेका मान्यता प्राप्त विश्वविद्यालय, कलेज, अनुसन्धान संस्था तथा अन्य उच्च शैक्षिक संस्थामा अध्ययनरत नेपाली विद्यार्थीले कार्यक्रममा आवेदन दिन सक्ने राजदूतावासले जनाएको छ।

कार्यक्रमको मुख्य उद्देश्य नेपाली विद्यार्थी र नेपाली राजदूतावासबीचको सम्पर्क तथा सहकार्यलाई थप सुदृढ बनाउनुका साथै नेपाल–भारतबीचको जनस्तरीय सम्बन्ध प्रवर्द्धनमा युवाको सक्रिय सहभागिता अभिवृद्धि गर्नु रहेको  उल्लेख छ।

राजदूतावासका अनुसार सामुदायिक सेवा, सार्वजनिक कूटनीति, सांस्कृतिक प्रवर्द्धन वा नेपाल–भारत सम्बन्धप्रति रुचि राख्ने नेपाली विद्यार्थीलाई कार्यक्रममा प्राथमिकताका साथ सहभागी गराइनेछ।

छनोटमा परेका दिल्ली–एनसीआर बाहेकका विभिन्न राज्य तथा केन्द्रशासित प्रदेशका नेपाली विद्यार्थीलाई इमेल वा टेलिफोनमार्फत Zoom Meeting बैठक मा सहभागी हुन आमन्त्रण गरिने राजदूतावासले जनाएको छ।

आवेदकले मान्यता प्राप्त उच्च शैक्षिक संस्थामा अध्ययनरत नेपाली नागरिक हुनुपर्ने, आधिकारिक विद्यार्थी परिचयपत्र (Student ID) भएको र सामुदायिक सेवा, सार्वजनिक कूटनीति, सांस्कृतिक प्रवर्द्धन वा नेपाल–भारत सम्बन्धप्रति रुचि भएको हुनुपर्ने योग्यता पूरा गरेको हुनुपर्ने बताइएको छ ।

राजदूतावासले “नेपाल–भारत विद्यार्थी दूत सञ्जाल (Nepal–India Student Ambassador Network)” मा सहभागिता पूर्ण रूपमा स्वैच्छिक (Voluntary) हुने स्पष्ट पारेको छ। उक्त सञ्जालमा आबद्ध हुँदा कुनै पनि प्रकारको कूटनीतिक, वाणिज्यदूत वा सरकारी प्रतिनिधिको आधिकारिक हैसियत प्राप्त नहुने उल्लेख गरिएको छ।

त्यसैगरी, कार्यक्रमको समयतालिका वा छनोट प्रक्रियामा आवश्यक परे राजदूतावासले परिवर्तन गर्न सक्ने जनाइएको छ।
त्यसका लागि connewdelhi@mofa.gov.np, culedu2013@gmail.com मा सम्पर्क गर्न  सकिन्छ ।

कार्यक्रम सम्बन्धी थप जानकारीका लागि भारतस्थित नेपाली राजदूतावासको आधिकारिक वेबसाइट हेर्न सकिन्छ।