हामी सबैकाे संसारन्यूज

काठमाडौँ । राष्ट्रिय स्वतन्त्र पार्टी (रास्वपा)ले आगामी स्थानीय निर्वाचनका लागि ७७ वटै जिल्लाबाट उम्मेदवार छनोट तथा टिकट वितरण प्रक्रिया अघि बढाउन ‘क्यान्डिडेट क्लब’ भाद्र १ गते सोमबार देखि सुरु गरेको छ। पार्टीले चुनाव लड्न इच्छुक आफ्ना सदस्य तथा शुभेच्छुकलाई क्यान्डिडेट क्लबमार्फत आवेदन दिन आह्वान गरेको हो।

रास्वपाले स्थानीय तहका विभिन्न पदमा उम्मेदवारी दिन इच्छुक व्यक्तिले निर्धारित प्रक्रियामार्फत आवेदन दिएर आफ्नो उम्मेदवारी सुनिश्चित गर्न सक्ने जनाएको छ। पार्टीले उम्मेदवार छनोटलाई व्यवस्थित, पारदर्शी र प्रतिस्पर्धात्मक बनाउने उद्देश्यले क्यान्डिडेट क्लब सञ्चालनमा ल्याएको बताएको छ।

रास्वपा सभापति रवि लामिछानेले पत्रकार सम्मेलनमार्फत पार्टीमा सुरुदेखि नै सक्रिय रहेका सदस्यलाई प्राथमिकता दिने संकेत गरेका छन्। उनले नयाँ व्यक्ति पार्टीमा प्रवेश गर्नेबित्तिकै टिकट लिएर जाने अवस्था नहुने स्पष्ट पार्दै पार्टी निर्माणमा सुरुदेखि योगदान गरेका नेता–कार्यकर्तालाई सकेसम्म अवसर दिने बताएका छन्।

उनका अनुसार उम्मेदवार छनोट गर्दा पार्टीमा लामो समयदेखि सक्रिय रहेका व्यक्तिको योगदान र भूमिकालाई समेत महत्वपूर्ण आधार बनाइनेछ। स्थानीय निर्वाचनमा सक्षम र जनतासँग जोडिएका उम्मेदवार अघि सार्ने रास्वपाको तयारी छ। आवेदन दिन पार्टीको वेवसाइट https://rspnepal.page.link/app मा गएर जोडिन भनिएको छ ।