हामी सबैकाे संसारन्यूज

काठमाडौँ । वरिष्ठ पत्रकार तथा जनआस्था साप्ताहिकका सम्पादक किशोर श्रेष्ठलाई रिहा गर्न सर्वोच्च अदाललते परमादेश जारी गरेको छ ।

उनकी पत्नी सरस्वती श्रेष्ठले दायर गरेको बन्दीप्रत्यक्षीकरणको रिटमाथि सुनुवाइ गर्दै सर्वोच्च अदालतका न्यायाधीशद्वय बालकृष्ण ढकाल र नहकुल सुवेदीको संयुक्त इजलासले श्रेष्ठलाई हिरासतमा नराखी हाजिर जमानीमा राखेर मुद्दाको अनुसन्धान गर्न आदेश दिएको हो।

श्रेष्ठलाई व्यक्तिगत गोपनीयतासम्बन्धी कसुरमा अनुसन्धानका लागि प्रहरीले पक्राउ गरी हिरासतमा राखेको थियो। उनको पक्राउ गैरकानुनी भएको दाबी गर्दै पत्नी सरस्वतीले साउन २८ गते सर्वोच्च अदालतमा बन्दीप्रत्यक्षीकरणको रिट दायर गरेकी थिइन्।

रिटमाथि साउन २९ गते न्यायाधीश बालकृष्ण ढकालको इजलासमा सुनुवाइ भएको थियो। उक्त इजलासले श्रेष्ठलाई बरामद गरिएका उपकरणसहित अदालतमा उपस्थित गराउन आदेश दिएको थियो।

श्रेष्ठको गिरफ्तारीप्रति नेपाल पत्रकार महासंघलगायत पत्रकारिता क्षेत्रका विभिन्न संस्थाले आपत्ति जनाउँदै तत्काल रिहाइको माग गरेका थिए।