हामी सबैकाे संसारन्यूज

हेटौंडा । बागमती प्रदेशका मुख्यमन्त्री इन्द्रबहादुर बानियाँले पदबाट राजीनामा दिएका छन् । सोमबार बसेको प्रदेशसभा बैठकमा विश्वासको मतको प्रस्ताव पेस गर्ने क्रममा सम्बोधन गर्दै बानियाँले मुख्यमन्त्री पदबाट राजीनामा घोषणा गरेका हुन् ।

नेकपा एमालेले गत साउन ६ गते प्रदेश सरकारलाई दिएको समर्थन फिर्ता लिएपछि मुख्यमन्त्री बानियाँ अल्पमतमा परेका थिए । संवैधानिक व्यवस्थाअनुसार समर्थन फिर्ता लिएको ३० दिनभित्र प्रदेशसभाबाट विश्वासको मत लिनुपर्ने भएपछि उनले सोमबार विश्वासको मत लिने तयारी गरेका थिए ।

तर सरकारलाई बहुमत जुटाउन आवश्यक राजनीतिक समर्थन नपाउने अवस्था बनेपछि बानियाँले मतदान प्रक्रियामा जानुअघि नै राजीनामा दिएका हुन् । एमाले र नेकपाले मुख्यमन्त्री बानियाँको विपक्षमा मतदान गर्ने निर्णय गरेका थिए भने राष्ट्रिय प्रजातन्त्र पार्टी (राप्रपा्)ले कुनै पनि पक्षमा नउभिने अर्थात् तटस्थ बस्ने निर्णय गरेको थियो । सत्ता पक्षसँग बहुमत नपुग्ने निश्चित भएपछि बानियाँले राजीनामाको बाटो रोजेका हुन् ।

राजीनामा घोषणा गर्नुअघि मुख्यमन्त्री बानियाँले आफ्नो एक वर्षे कार्यकालमा प्रदेश सरकारले गरेका कामको २८ बुँदे प्रगति विवरण प्रदेशसभामा प्रस्तुत गरेका थिए । उनले आफ्नो नेतृत्वको सरकारले प्रदेशको विकास, पूर्वाधार, स्वास्थ्य, शिक्षा, कृषि तथा अन्य क्षेत्रमा गरेका कामबारे जानकारी गराएका थिए ।

विश्वासको मत लिन प्रदेशसभामा पुगेका बानियाँले राजनीतिक समीकरण आफ्नो पक्षमा नदेखिएपछि विश्वासको मतको सामना नगरी पदबाट राजीनामा दिएका हुन् । उनको राजीनामासँगै बागमती प्रदेशमा नयाँ सरकार गठनको प्रक्रिया अघि बढ्ने भएको छ ।

अब प्रदेश प्रमुखले संविधानअनुसार नयाँ सरकार गठनका लागि प्रक्रिया अघि बढाउनेछन् । बागमती प्रदेशसभामा रहेका दलहरूको वर्तमान शक्ति समीकरणअनुसार नयाँ सरकार गठनका लागि आवश्यक बहुमत जुटाउने विषयमा राजनीतिक दलहरूबीच छलफल सुरु हुने देखिएको छ ।