Sansar News
काठमाडौं । रसुवाको भोटेकोसी नदीमा आएको बाढीका कारण आफन्तजन हराइरहेका परिवारलाई फेला परेका शव तथा शरीरका अंग वा भागको डीएनए परीक्षणमार्फत पहिचान गर्न नमुना उपलब्ध गराउन नेपाल प्रहरीले अनुरोध गरेको छ।
नेपाल प्रहरीले सूचना जारी गर्दै भदौ १० गतेको भोटेकोसी बाढीमा परी हराइरहेका नेपाली तथा विदेशी नागरिकका आफन्तलाई शव पहिचानका लागि सबैभन्दा नजिकको रक्तसम्बन्धी आफन्तको नमुना संकलन गराउन आग्रह गरेको हो।
प्रहरीका अनुसार हराइरहेका व्यक्तिको बाबु, आमा, छोरा वा छोरीमध्ये कुनै एक जनाको नमुना संकलन गरिनेछ। नमुना दिन जाँदा पासपोर्ट साइजको दुई प्रति फोटो साथमा लैजानुपर्नेछ।
नमुना संकलनका लागि नेपाल प्रहरी अस्पताल, महाराजगन्जस्थित प्याथोलोजी ल्याब वा नजिकको जिल्ला प्रहरी कार्यालयमा सम्पर्क गर्न सकिने प्रहरीले जनाएको छ।
विदेशमा रहेका आफन्तसँग पनि अनुरोध
विदेशमा रहेका आफन्तको हकमा भने बाबु, आमा, छोरा वा छोरीमध्ये कुनै एक जनाले सम्बन्धित मुलुकमै डीएनए प्रोफाइलिङ गराई त्यसको प्रतिलिपि नेपाल प्रहरीलाई पठाउन सक्ने व्यवस्था मिलाउन अनुरोध गरिएको छ।
प्रहरीले विदेशमा गराइएको डीएनए प्रोफाइलिङको प्रतिलिपि तुलना परीक्षण (Comparison)का लागि नेपाल प्रहरीको आधिकारिक इमेलमा पठाउने व्यवस्था गर्न सम्बन्धित निकाय तथा परिवारलाई आग्रह गरेको छ।
भोटेकोसी बाढीपछि विभिन्न स्थानबाट फेला परेका शव तथा शरीरका अंगको पहिचानमा डीएनए परीक्षण महत्वपूर्ण हुने भएकाले हराइरहेका व्यक्तिका परिवारलाई यथाशीघ्र नमुना उपलब्ध गराउन प्रहरीले अनुरोध गरेको हो।
यसबारे थप जानकारीका लागि सम्पर्क अधिकृत प्रहरी निरीक्षक शम्भुबहादुर केसीको मोबाइल नम्बरमा ९८४१६१६०९५ फोन गर्न सकिन्छ ।
वि.सं.२०८३ भदौ १५ सोमवार १३:४३ मा प्रकाशित
