Sansar News
१ भदौ, राजविराज । सप्तरीमा एक हप्ता अगाडि अविरल वर्षासँगै विभिन्न नदी तथा खोलामा आएको बाढीले झण्डै २० हजार घरका एक लाख व्यक्ति प्रभावित भएका छन् ।
बाढीबाट चार हजार व्यक्ति विस्थापित भएका छन् । बाढीबाट जिल्लाका रम्पुरा मल्हनिया, सकरपुरा बनरझुलालगायत टोल पूर्ण रुपमा डुबानमा परेका छन् ।
वर्षापछि खाँडो खोलामा आएको बाढीले रम्पुरा मल्हनिया गाविसका करिब एक हजार घर तथा सकरपुराका ८९९ घर पूर्ण रुपमा डुबानमा परेको स्थानीयवासी चन्दन यादवले बताउनुभयो । वर्षाले गर्दा प्रत्येक व्यक्तिका घरमा पानी पसेपछि बाढीपीडित घर नजिकैको बाँध तथा विद्यालयको आश्रय लिई रात बिताउँदैछन् । उनीहरु अहिले पनि भोकभोकै जाग्राम बस्न बाध्य भएको यादवले गुनासो गर्नुभयो ।
बाढीले घर घरमा करिब ५ फिटसम्म पानी पसेको तर हालसम्म कुनै पानीको निकास हुन नसकेको रम्पुरा मल्हनियाका सोसिन्द्र यादवले जानकारी दिनुभयो ।
स्थानीय राजेन्द्र देवकी आधारभूत विद्यालय कोइलाडी विद्यालयमा आश्रय लिँदै आएका झण्डै दुई सय परिवारलाई राहत नआएको पीडितले गुनासो गरेका छन् ।
वि.सं.२०७४ भदौ १ बिहीवार १५:५३ मा प्रकाशित
