हामी सबैकाे संसारन्यूज

१४ पुस, काठमाडौँ   : निजी आवास निर्माणका लागि अनुदान पाउने सूचीमा नाम भएका तर घर बनाउन आवश्यक नठान्ने लाभग्राहीले पहिलो किस्ताबापत लिएको रु ५० हजार फिर्ता गरेका छन् ।

मकवानपुरका दुई जनालाभग्राहीले रकम फिर्ता गरेको राष्ट्रिय पुनर्निर्माण प्राधिकरणले जनाएको छ । पहिलो किस्ताको रकम सरकारी खातामै फिर्ता गर्ने लाभग्राहीमा इन्द्रसरोबर गाउँपालिका–२ का रामशरण भुलुन र हेटौँडा नगरपालिका–८ का तुलाबहादुर लामा हुनुहुन्छ ।

लाभग्राही सूचीमा नाम समावेश गरी पहिलो किस्ता लिएपनि घर बनाउन आवश्यक नभएको भन्दै रकम फिर्ता गरी लाभग्राहीबाट नाम हटाउन आग्रह गर्नु भएको हो । पुस १३ गते बिहीबार बसेको प्राधिकरण कार्यकारी समितिको बैठकले भुलुन र लामाले रकम फिर्ता गरेकामा धन्यवाद दिँदै दुवैको नाम लाभग्राही सूचीबाट हटाउन निर्णय गरेको छ । कार्यकारी समितिले विगतमा आवश्यक नपर्दा पनि लाभग्राही सूचीमा नाम राखेका व्यक्तिलाई रकम फिर्ता गर्न अनुरोध पनि गरेको छ ।

लाभग्राही सूचीमा परेपनि घर आवश्यक नपर्ने लाभग्राहीले सरकारको १५०१२ राजश्व शीर्षकमा रकम फिर्ता गरी लाभग्राहीबाट नाम हटाउन सक्ने प्राधिकरणका प्रवक्ता यमलाल भुसालले बताउनुभयो । घर आवश्यक नपर्ने लाभग्राहीले यसरी नाम हटाई रकम फिर्ता गरे वास्तविक भूकम्पपीडितलाई राहत पुग्ने उहाँको विश्वास छ ।

प्राधिकरणले बस्न योग्य घर भएका वा अन्यत्र घर भएका व्यक्तिले लाभग्राही सूचीमा आफ्नो नाम पारेको भए सम्बन्धित जिल्ला समन्वय समितिको सचिवालयमा सम्पर्क गरी रकम फिर्ता गरेर सूचीबाट हटाउन यसअघि नै सूचना प्रकाशित गरी अनुरोध गरिसकेको छ ।