Sansar News
१७ चैत,काठमाडौँ । नेपाल ट्रेड युनियन महासंघ (जिफन्ट)को अध्यक्षमा विनोद श्रेष्ठ निर्वाचित भएका छन् । सातौँ राष्ट्रिय महाधिवेशनले आज श्रेष्ठको अध्यक्षतामा ५१ सदस्यीय केन्द्रीय समिति निर्वाचित गरेको हो ।
चार वर्षे कार्यकालका लागि श्रेष्ठले अर्का प्रतिस्पर्धी विष्णु लम्सालसँग गोलाप्रथामा पराजित गर्दै निर्वाचित भएका हुन् । दुवैजनाको समान १९१ मत आएपछि गोलाप्रथाबाट श्रेष्ठ अध्यक्षमा निर्वाचित हुनुभएको वर्तमान उपाध्यक्ष जितेन्द्र श्रेष्ठले बताए ।
लम्साललाई अनुशासन आयोगको अध्यक्ष बनाइएको छ । यसैगरी उपाध्यक्षमा विदुर कार्की, जितेन्द्र श्रेष्ठ, रमेश वडाल, मन्जु थापा, मीना गुरुङ, दीपक पौडेल, कमल गौतम र गुणराज आचार्य रहेका छन् ।
यस्तै, महासचिवमा जनक चौधरी, उपमहासचिवमा गीता कार्की र दिनेश राई निर्वाचित भएका छन् । ‘सुदृढ लोकतन्त्र र समृद्ध श्रमजीवि वर्ग’ भन्ने नाराका साथ यही चैत १४ गतेदेखि महाधिवेशन काठमाडौँमा शुरु भएको थियो ।
महाधिवेशनमा ४१२ प्रतिनिधिसहित २० देशका ४८ जनाको सहभागिता रहेको थियो । जिफन्टमा चार लाख ४० हजार सदस्य आबद्ध रहेका छन् ।
वि.सं.२०७४ चैत १७ शनिवार २१:१४ मा प्रकाशित
