Sansar News
१ कार्तिक, काठमाडौँ । एसियाली फुटबल महासङ्घ (एएफसी)ले मलेसियामा हुने एएफसी सोलिडारिटी कप फुटबल प्रतियोगिताको खेल तालिका आइतबार सार्वजनिक गरेको छ ।
आगामी कात्तिक १७ गतेदेखि सञ्चालन हुने उक्त प्रतियोगितामा विभिन्न सात टोलीको सहभागिता रहेको छ । नेपाल समूह ‘ए’ मा परेको छ । उक्त समूहमा ब्रुनाई र टिमोर लेस्टेसमेत छन् । त्यसैगरी, समूह ‘बी’मा श्रीलङ्का, मकाउ, मङ्गोलिया र लाओस रहेका छन् ।
नेपालले पहिलो खेल कात्तिक २० गते टिमोर लेस्टेसँग तथा दोस्रो खेल कात्तिक २३ गते ब्रुनाईसँग खेल्नेछ । समूह विजेता र उपविजेता सेमिफाइनल प्रवेश गर्नेछन् । प्रतियोगिताको फाइनल खेल कात्तिक ३० गते हुनेछ । एएफसीले सन् २०१८ को विश्वकप र सन् २०१९ को एसिया कपबाट बाहिरिएका टोलीबीच पहिलो पटक एएफसी सोलिडारिटी कप आयोजना गर्न लागेको हो ।
विश्वकप छनोटबाट बाहिरिएका एसियाली टोलीले लामो समयसम्म अन्तर्राष्ट्रिय प्रतियोगिता खेल्न नपाउने स्थिति आएपछि एएफसीले सोलिडारिटी कप आयोजना गरेको हो । उक्त प्रतियोगिताका लागि अखिल नेपाल फुटबल सङ्घ (एन्फा)ले आजदेखि ३० खेलाडीलाई प्रारम्भिक चरणको बन्द प्रशिक्षणमा राखेको छ ।
वि.सं.२०७३ कात्तिक १ सोमवार ०३:२३ मा प्रकाशित
