Sansar News
१७ असोज, काठमाडौं । नेपाली कामदारले कतार पुगेपछि गनुपर्ने स्वास्थ्य परीक्षण र रोजगारीको सम्झौता अब काठमाडौमा नै हुने भएको छ । कतार सरकारले काठमाडौंमै श्रम, गृह र स्वास्थ्य मन्त्रालयका संयन्त्र राखी सेवा दिन लागेको हो ।
यो व्यवस्था सँगै अब कतार पुगेपछि करारपत्र बदलिने समस्या हट्नेछ । रोजगारदातासँगको करारपत्रमा कामदारले काठमाडौंमै हस्ताक्षर गर्न पाउने पनि आजको कान्तिपुर दैनिकमा समाचार छ ।
कतारले आउदो नोभेम्बरदेखि काठमाडौंमा भिसा सेन्टर खोल्ने र त्यसका लागि दैनिक ३ सय कामदारलाई सेवा दिन मिल्ने गरी महाराजगन्जमा भवन समेत लिइसकेको कतारका लागि नेपाली राजदूत कमल कोइरालाले जानकारी दिए ।
‘यो सेन्टरले काम सुरु गरेपछि नेपाली कामदारको करारपत्र परिवर्तन हुँदैन् । उनले भने । त्यसपछि रोजगारदाता कम्पनी सरकारले लागू गरेको न्यूनतम तलब कार्यान्वयन गर्न बाध्य हुनेछन् । यसअघिसम्म सन् २०१३ मा नेपालले तोकेको १२ सय रियाल दिन सबै रोजगारदाता बाध्य थिएनन् ।
वि.सं.२०७५ असोज १७ बुधवार ०७:३८ मा प्रकाशित
