हामी सबैकाे संसारन्यूज

१७ असोज, काठमाडौं । नेपाल आयल निगमको तेल बोक्ने ट्यांकरबाट मंगलबार २ सय ९५ केजी गाँजा बरामद भएको छ । नेपालमा तेल खन्याएर भारततर्फ फर्किदै गरेको ना ४ ख ३९६९ नम्बरको ट्यांकरबाट प्रहरीको लागुऔषध नियन्त्रण ब्युरोले गाँजा बरामद गरेको आजको नयाँपत्रिका दैनिकमा समाचार छ ।
व्युरोले मकवानपुरको मनहरि ७ रमनटारमा गुडिरहेको ट्यांकर नियनत्रणमा लिएको छ । तस्करीमा संलग्न रहेको अभियोगमा ट्यांकर चालक बारा जितपुर सिमनामा ३८ वर्षीय प्रल्हाद ठकुरी पक्राउ परेका छन् ।
ब्युरोका एसएसपी विश्वराज पोखरेलले इन्धन बोक्ने ट्यांकरमा लागुऔषध तस्करी हुनु देशकै लज्जाको विषय भएको बताए । उनले भने, ‘लागुऔषध तस्करले तस्करीका लागि अनेक उपाय लगाउँछन् । तर, पछिल्लोपटक इन्धन बोक्ने ट्यांकर नै प्रयोग गरेको पाइयो । यसो हुनु लज्जाको विषय हो । यस विषयमा गम्भीर अनुसन्धान हुन आवस्यक छ । प्रहरी यसैमा केन्द्रित छ ।’ तस्करले ट्यांकरको तीनवटा खोपामध्ये एउटामा गाँजाको चाङ लगाएर तस्करी गरेको प्रहरीले बतायो ।