हामी सबैकाे संसारन्यूज

६ मंसीर, बाजुरा । दलित अगुवा, नेकपाका नेता एवं बूढीगंगा नगरकार्यपालिका सदस्य टीका विकको बुधवार निधन भएको छ । भारतको नयाँ दिल्लीमा उपचार गराइरहेका विकको ४१ वर्षको उमेर निधन भएको पारिवारिक स्रोतले बताएको छ ।
पित्तथैली र पेटको समस्याका कारण दिल्लीमा उपचार गराइरहेका विकको अस्पतालमै उपचारका क्रममा निधन भएको आफन्त समेत रहनुभएका नेकपाका नेता भरत थापाले जानकारी दिए । विकले ६ महिना पहिले मात्र काठमाडौंँमा पित्तथैलीमा रहेको पत्थरीयाको शल्यक्रिया गराउनुभएको थियो ।
हलिया मुक्तिको आन्दोलनमा नेतृत्वदायी भूमिका खेल्नुभएका विक दुई दशकदेखि दलित अधिकारका पक्षमा सङ्घर्षरत थिए । उनका श्रीमती र दुई सन्तान छन् ।
राजनीतिक आस्था र विचारभन्दा माथि उठेर वर्गीय आन्दोलनका पक्षमा लड्ने व्यक्तित्व विकले बाजुराको नागरिक आन्दोलनको समेत अगुवाइ गरेको थियो । विकले सम्हालेको नेतृत्व र भूमिकाकै कारण हलियाको मुक्तिका लागि पुगेको बताइन्छ ।
विद्यार्थी जीवनदेखि नै समाजसेवा, विभेदरहित समाज र अन्यायका विरुद्धमा लड्ने स्वभावका विकले पार्टी राजनीतिमा हुँदा पनि समाज विकास र दलित समुदायलाई पहिलो प्राथाकितामा राखेर काम गरेका थिए ।