१३ कात्तिक, इनरुवा । सुनसरीमा बसको ठक्करबाट शुक्रबार एक साइकल यात्रीको मृत्यु भएको छ ।
मृत्यु हुनेमा सुनसरीको इटहरी–१६ एकम्वा बस्ने १८ वर्षीया प्रतिमा चौधरी रहेको जिल्ला प्रहरी कार्यालय सुनसरीले जनाएको छ ।
भासी–५ स्थित महेन्द्र राजमार्गमा पश्चिमबाट पूर्वतर्फ जाँदै गरेको ना४ख ७३९४ नंको बसले साइकल यात्रीलाई ठक्कर दिँदा चौधरीको मृत्यु भएको हो ।
चौधरीलाई ठक्कर दिँदा गम्भीर घाइते भएकाले उपचारका लागि जिल्ला अस्पताल इनरूवामा ल्याई उपचारका क्रममा मृत्यु भएको प्रहरीले जनाएको छ ।
महिलाको शव फेला
सप्तकोसी नदीमा शुक्रबार बेवारिसे अवस्थामा एक महिलाको शव फेला परेको छ ।
सुनसरी हरिपुर गाविस–९ स्थित सप्तकोसी नदीमा पानीले बगाई ल्याएको महिलाको शव फेला परेको जिल्ला प्रहरी कार्यालय सुनसरीले जनाएको छ ।
अन्दाजी ६५ वर्षीया मङ्गोलियन अनुहारको कानमा पहेँलो धातुको मुन्द्री लगाएकी, हातमा सेतो धातुको चुरा लगाएकी, उचाइ ४ फिट भएकी शरीर पातलो, नग्न अवस्थामा महिलाको शव फेला परेको हो । शव नदीबाट बाहिर निकाल्दा मुखबाट हल्का रगत निस्किएको देखिएको प्रहरीले जनाएको छ ।
