Sansar News
१५ फागुन, लण्डन, बेलायत । आफूले युरोपेली युनियन (ईयू) सँग गरेको सम्झौतालाई अनुमोदन पनि नगर्ने र ईयूबाट सम्झौताहिन बहिर्गमन गर्नुपर्ने सम्भावना देखिएमा ब्रेक्जिटलाई पछि सार्ने वा नसार्ने विषयमा निर्णय लिन आफूले संसद्को सहारा लिने प्रधानमन्त्री टरिजा मेले मङ्गलबार बताउनुभएको छ ।
“यदि ती दुवै विकल्प अस्वीकृत भएमा सरकारले आगामी मार्च १४ मा संसद्मा धारा ५० अन्तर्गत तोकिएको बहिर्गमन प्रक्रियालाई छोटो तर निश्चित समयका लागि पर सार्र्न मतदानमार्फत सांसदबाट अनुमति लिने निर्णय मेरो रहेको छ,” प्रधानमन्धी मेले भने ।
उनले भने,“बहिर्गमन प्रक्रियामा हुने ढिलाइ आगामी जुनसम्मका लागि पछि सार्नेबारे संसदमा छलफल गरिनेछ ।”
युरोपेली युनियन (ईयू) बाट बेलायतको बहिर्गमन (ब्रेक्जिट) विषयमा यस साता संसद्मा हुने भनिएको मतदान केही पर सर्नसक्ने बेलायतकी प्रधानमन्त्री टरिजा मेले दुई दिन पहिले बताएका थिए ।
प्रधानमन्त्री मेले इजिप्टमा हुने युरोपेली तथा अरब मुलुकका नेताहरूको सम्मेलनमा सहभागी हुन जाने क्रममा भने, “मतदानको दिन केही पर सर्ने सम्भावना भए पनि आगामी मार्च १२ सम्ममा संसद्मा मतदान गरिनेछ ।”
वि.सं.२०७५ फागुन १५ बुधवार ११:१८ मा प्रकाशित
