४ बैशाख, काठमाडौ । साउदी अरबस्थित तीन कम्पनी पल्टँदा झन्डै १५ हजार नेपालीको रोजगारी गुमेको छ । कम्तीमा तीन हजार नेपाली स्वदेश फर्कन नपाएर अलपत्र छन् । उनीहरुको समस्या दिन प्रतिदिन चुलिँदै छ ।
साउदीको अजमिल कन्स्ट्रक्टिङ कम्पनी, अजमिलको भगेनी कम्पनी अर्कद, जे एन्ड पी र साउदी मार्बल एन्ड ग्रिनाइटेडमा कार्यरत नेपाली कामदारको रोजगारी गुमेको हो । अजमिलमा मात्रै १० हजार नेपालीको रोजगारी गुमेको छ । अर्कदमा तीन हजार, जे एन्ड पी साउदी मार्बलमा कम्तीमा २ हजार नेपालीले रोजगार गुमाउनुपरेको छ ।
अजमिलले एक वर्षमा झन्डै ७ हजार नेपालीलाई फिर्ता पठाइसकेको छ, साउदीको दमामस्थित नेपाली दूतवासका प्रतिनिधि हरि घिमिरेले कान्तिपुरलाई फोनमा भने । अजमिलले कामबिशीन भएर लामो समयदेखि बसिरहेका ३ हजारलाई स्वदेश पठाएको छैन । बुधबारको कान्तिपुर दैनिकमा होम कार्कीले लेखेका छन् ।
वि.सं.२०७६ वैशाख ४ बुधवार ०८:०६ मा प्रकाशित
