डिसी । स्थापनाकाल देखि नै विवादै विवादको भुमरीमा जकडिएको एनआरएन अमेरिकालाई अर्को समस्या परेको छ । आगामी मे १८ र १९ मा तय भै सकेको एनआरएनए एनसीसी युएसएको चुनावलाई स्थगित गर्न तथा निर्वाचन समितिका प्रमुख बिश्व बराललाई अयोग्य ठहर गर्न माग गर्दै अदालतमा मुद्धा दायर भएको छ ।
बाल्टिमोर निवासी तथा गैरआवासीय नेपाली संघ राष्ट्रिय समन्वय समिति अमेरिकाको पूर्वउपाध्यक्ष रविना थापा तथा व्यवसायी तथा समाजसेवी नारायण थापाले अमेरिकाको टेनेसी राज्यमा मुद्धा दायर गरेका हुन् ।
एनआरएनए अभियान तथा सामाजिक सेवामा अनुभव बटुलेकी रविना थापा सन् २०१७–२०१९ को लागि अध्यक्षकी उम्मेदवार थिइन् । रबिना थापा तथा नारायण थापा पतिपत्नी हुन् भने यो मुद्धाको सुनुवाई मे १३ मा हुने छ ।
बिश्व बराल,भुवन गुरुङ,अन्जन श्रेष्ठ ,गौरी जोशी ,अध्यक्ष केशव पौडेल लगायत सन् २०१७ कि निर्वाचन समितिका प्रमुखलाई प्रतिवादी बनाईएको छ । अमेरिकाको टेनेसी को नक्स काउन्टी चान्सलरी कोर्टमा गत अप्रिल २६ का दिन दायर गरि मुद्धा दायर संख्या १९६०८१९३ रहेको छ ।
उक्त मुद्धा थापा दम्पतिका तर्फबाट ग्रेगरी ब्राउन र रथ एसम्यानले मुद्धा दर्ता गरेका हुन् ।
एनआरएनएको चुनाव रोक्नु पर्ने,एनआरएन अमेरिकाको साधारण सभा ३० दिन भित्र बोलाउन र नयाँ निर्वाचन प्रमुख नियुक्त गरेर मात्र निर्वाचन गराउन आदेश दिन समेत न्यायालयमा अनुरोध गरेका छन् ।
संस्थाका महासचिव बिआर लामाले सम्पूर्ण सदस्यहरुलाई बिधुतिय डाकद्वारा जानकारी गराएका थिए । उक्त मुद्धाको बिबरण ५० पृष्ठ को रहेको छ । एनआरएन अमेरिकालाई स्थापनाकाल देखि नै मुद्धा खेप्दै आई रहेको छ ।
विवाद र झगडामा अल्झिएको कारण बिश्वकै सर्वाधिक भएको एनआरएनए अमेरिकालाई अस्ट्रेलियाले सदस्य संख्यामा उछिनेको छ । अब बिश्वकै सबैभन्दा ठुलो राष्ट्रिय समन्वय समिति अस्ट्रेलिया भएको छ ।
आसन्न निर्वाचनका लागि उम्मेदारहरुका बहस ,उम्मेद्वारहरु व्यापक प्रचार प्रसारमा लागि रहेको अवस्थामा निर्वाचन स्थगन गरियोस भनि न्यायालयमा मुद्धा दायर भएकोले अन्यौलको स्थिति छाएको छ ।
वि.सं.२०७६ वैशाख १८ बुधवार १४:१५ मा प्रकाशित
