हामी सबैकाे संसारन्यूज

२५ असार, तनहुँ । भानु नगरपालिका–५ कार्यालयले आफ्नो क्षेत्रका ६९ ज्येष्ठ नागरिकलाई घरमै पुगेर सम्मान गरेको छ ।

वडाले ८० वर्षमाथि उमेर समूहका वृद्धवृद्धालाई ‘ज्येष्ठ नागरिक सम्मान कार्यक्रम’ अन्तर्गत झुल, थर्मस, ग्लुकोज र फ्रुटीलगायत सामग्री प्रदान गरेको वडाध्यक्ष प्रकाश मल्लले जानकारी दिए ।

शारीरिक रुपमा अशक्त वृद्धवृद्धालाई घरघरमा सामग्री वितरण गर्दा उनीहरुमा खुशीको सीमा नै थिएन भन्दै उनले वडाबाट गएका जनप्रतिनिधि तथा कर्मचारीलाई उनीहरुले मनले आँटेको काम पूरा होस् भन्दै आशीर्वाद दिएका थिए ।

उक्त वडा निवासी सबैभन्दा बढी उमेरकी ११४ वर्षीया गोपीमाया पोख्रेललाई हिँडडुल गर्न गाह्रो भए पनि स्वास्थ्य राम्रो रहेको भेटिएको वडाध्यक्ष मल्लले बताए ।

ज्येष्ठ नागरिकलाई प्रदान गरिने सामाजिक सुरक्षा भत्तासमेत सहजरुपमा वितरण गर्दै आएको वडा कार्यालयले जनाएको छ ।