हामी सबैकाे संसारन्यूज

७ साउन, गुल्मी । गुल्मी जिल्लाको सत्यवती गाउँपालिका वडा नम्बर ३ र ४ मा पहिरो जाँदा ६ जनाको मृत्यु भएको छ ।उक्त पहिरोमा परी ८ जना बेपत्ता रहेको र ४ घर पहिरोले बगाएको छ । राती १० बजे आसपासबाट सुरु भएको पहिरो जाने क्रम अझै नरोकिएको जिल्ला प्रहरी कार्यालयले जनाएको छ ।

जिल्ला सदरमुकाम तम्घासबाट ७५ किलोमिटर पूर्वाेत्तरमा मा पर्ने सत्यवती गाउँपालिकाको वडा नम्बर ३ को ठूलो लुम्पेक र वडा नम्बर ४ लिम्घामा पहिरोले गाउँनै बगाएको प्रहरी नायव उपरीक्षक मीनबहादुर घलेले जानकारी दिए । पहिरोमा परी लिम्घा करेनडाँडाकी ३२ वर्षकी जुनु तरामी र उनका ९ वर्षका छोरा दर्शन तरामीको मृत्यु भएको छ । यस्तै रातिबाट बेपत्ता भएका करेन डाँडाकै ८ जना मध्ये ४ जनाको शब प्राप्त भएको जिल्ला प्रहरी कार्यालय गुल्मीले बताएको छ । मृतकको अहिलेसम्म सनाखत हुन नसकेको घटनास्थल पुगेका प्रहरी नायव उपरीक्षक घलले जानकारी दिए । ठूलो लुम्पेकमा पहिरोमा परी ४ जना बेपत्ता भएका छन् । यसैगरी लिम्घाको पहिरोमा परी ४ जना बेपत्ता भएको प्र.ना.उ. घलेले जानकारी दिए ।

प्र.ना.उ घलेका अनुसार करेन डाँडाका ३ घर पहिरोले बगाएको छ । यस्तै ठूलो लुम्पेकमा पनि पहिरोले ४ घर बगाएकोे घलेले बताए । अहिले प्र.ना.उ घलेका नेतृत्वमा बिहान ४ बजे तम्घासबाट हिडेको टोली घटनास्थल पगिसकेको छ । यसैगरी रिणी इप्रकाका प्रहरी निरिक्षक राधाकृण सिंह र जुहाङग चौकीका प्रहरी नायव निरिक्षक खुमबहादुर खड्काको टिम पनि घटनास्थल पुगिसकेको छ । प्रहरीका अनुसार अहिले स्थानीय जनताको सहयोगमा प्रहरीले राहत र उद्धार कार्य गरिरहेको छ । प्रहरी राहत र उद्धारमा खटिएकोले भौतिक क्षति कति भयो भनेर अझै आंकलन गर्न नसकेको प्र.ना.उ घलेले जानकारी दिए ।