हामी सबैकाे संसारन्यूज

८ साउन, काठमाडौँ । प्रधानन्यायाधीश चोलेन्द्रशम्शेर जबरा र रुसी महासङ्घको सर्वोच्च अदालतका अध्यक्ष भ्याचेस्लाभ एम लेवेदेभबीच आज भेटवार्ता भएको छ ।

प्रधानन्यायाधीश राणाको मैत्रीपूर्ण निमन्त्रणामा चारदिने औपचारिक भ्रमणका लागि सोमबार अध्यक्ष लेवेदेभ नेपाल आइपुगेका थिए । उनीहरुबीच नेपाल–रुसी महासङ्घको लामो समयदेखिको सौहार्दतापूर्ण र सुमधुर सम्बन्धबारे छलफल भएको सर्वोच्च अदालतका सञ्चारविज्ञ किशोर पौडेलले जानकारी दिए।

भेटका क्रममा प्रधानन्यायाधीश राणाले नेपालमा न्यायपालिकाको योजनाबद्ध सुधारका रुपमा रहेको रणनीतिक योजना र यसको कार्यान्वयनमा जानकारी दिए। उनले रणनीतिक योजनामै समग्र न्यायिक सुधार र न्यायिक सुशासनको विषय प्राथमिकतामा रहेकाले यसको कार्यान्वयन नै प्राथमिकतामा रहेको बताए । प्रधानन्यायाधीश राणाले दुई देशबीच भएको कूटनीतिक सम्बन्ध तथा विगतमा भएका भ्रमण र अनुभव आदानप्रदानले न्यायिक सुधारका लागि सहयोग मिलेको स्मरण गरे ।

यही साउन ९ गतेसम्म भ्रमणमा आएका अध्यक्ष लेवेदेभसहित भ्रमण दलमा तीन जना रहेका छन्। नेपाल भ्रमणका क्रममा उनीहरुले विभिन्न उच्चस्तरीय भेटवार्ता गर्ने कार्यक्रम छ । प्रधानन्यायाधीश राणाले गत जेठमा रुसीे सर्वोच्च अदालतका भ्रमणका क्रममा उनलाई नेपाल भ्रमणको निमन्त्रणा दिएका थिए ।(रासस)