हामी सबैकाे संसारन्यूज

अँ हजुर, म मै हुँ !
बोल्छु कराउँछु
विश्वास दिलाउँछु
वचनबध्द हुन्छु
एकपटक दुईपटक हैन
पटकपटक झुक्याउँछु
नपत्याए हेर्नुहोस्
चुनाव जितेको जित्यै छु
सिन्को भाँचिएन त के भो ?
भाषण त ठोकेको ठोक्यै छु
भ्रष्टाचार रोकिएन त के भो ?
खर्च सर्च कमिसन समिसन
भत्ता सत्ता बुझेको बुझ्यै छु
कानुनले बाटो बिरायो त के भो ?
म विदेश हिँडेको हिँड्यै छु
जनता आहतमा परे त के भो ?
गरी खाऊ भनेको भन्यै छु
युवा रोजगार भएनन् त के भो ?
श्रम समझौता गरेकोे गर्‍यै छु
बाढी पहिरो भुँइचालो आउँछन् त के भो ?
म त मस्त घुरेको घुर्‍यै छु
सडकमा मान्छे कुर्लन्छन् त के भो ?
म मेरै गुटभित्र सुरक्षित छु
त्यसैले जे छ ठिक छ
बाँकी काम विस्तारै हुन्छ
हो नि हजुर ! म, मै हुँ !!
उभिएकै छु विस्तारै हुन्छ !!!