हामी सबैकाे संसारन्यूज

५ भदौ , काठमाडौँ । समायोजन सम्पन्न भएको लामो समयसम्म पनि कर्मचारी व्यवस्थापनको काम सम्पन्न हुन सकेको छैन ।

स्थानीय र प्रदेश तहमा समायोजन भएका कर्मचारी सोही तहमा गए पनि हाजिर नगरी फिर्ता पठाएसँगै समायोजनमा नै समस्या देखिएको हो ।

सरकारले समायोजन सम्पन्न गरेर कार्यक्षेत्रमा जान निर्देशन दिएको लामो समय भइसकेको छ । तर, समायोजनपछि कार्यक्षेत्रमा पुगेका सयौं कर्मचारी फिर्ता भएका छन् । ।

संघीय मामिला तथा सामान्य प्रशासन मन्त्रालयका अनुसार ती तहबाट फिर्ता भएका १२५ कर्मचारी मन्त्रालयमा हाजिर हुने गरेका छन् ।

मन्त्रालयका सहसचिव रूद्रसिंह तामाङका अनुसार ती कर्मचारीलाई विभागीय मन्त्रालयमा व्यवस्थापन गरिएको छ । ‘हालसम्म १२० जनालाई सम्बन्धित मन्त्रालयमा व्यवस्थापन गरेका छौं, यो तत्कालीन समाधान हो, उनीहरुलाई समायोजन भएकै स्थानमा नै पठाउने प्रयासमा छौं,’ उनले भने । उनीहरुलाई समायोजन भएको तहमा नै पठाउनका लागि सम्बन्धित तहसँग छलफल जारी रहेको तामाङको भनाइ छ । बिहीबारको राजधानी दैनिकबाट