हामी सबैकाे संसारन्यूज

९ भदौ , काठमाडौं । काठमाडौं, चितवन र पर्सामा भएका छुट्टाछुट्टै सवारी दुर्घटनामा परी ३ जनाको मृत्यु भएको छ ।

काठमाडौं महानगरपालिका-९ सिनामंगलस्थित सडकमा बा.२ ख ४३१७ नम्बरको टिपरले बा.३८ प २३९३ नम्बरको मोटरसाइकललाई आइतबार राति ठक्कर दिँदा मोटरसाइकल चालक पछाडा भोटेको घटनास्थलमै मृत्यु भएको हो । सोही टिपरले बा.८५ प ५६९ नम्बर र ना.४३ प ८७३५ नम्बरको मोटरसाइकललाई समेत ठक्कर दिएको थियो ।

टिपरको ठक्करबाट घाइते भएका मोटरसाइकलमा सवार अन्य ३ जनामध्ये २ जनालाई केएमसी अस्पताल सिनामंगल र १ जनालाई ट्रमा सेन्टरमा उपचारको लागि ल्याइएको छ । टिपर र चालकलाई प्रहरीले नियन्त्रणमा लिएको छ ।

त्यसैगरी चितवन, भरतपुर महानगरपालिका -४ शिवघाटस्थित सडकमा ना.६० प ३७३५ नम्बरको मोटरसाइकलले ना.५५ प ३५६८ नम्बरको स्कुटरलाई आइतबार राति ठक्कर दिई दुर्घटना हुँदा गम्भीर घाइते भएका मोटरसाइकल चालक भरतपुर महानगरपालिका -२३ जगतपुर का सूर्यबन्धु खनाल क्षेत्रीको पुरानो मेडिकल कलेज भरतपुरमा उपचारको क्रममा मृत्यु भएको छ । दुवै सवारी साधन र स्कुटर चालकलाई प्रहरीले नियन्त्रणमा लिएको छ ।

यसैबीच पर्सा, पर्सागढी नगरपालिका -४ सवैयास्थित सडकमा ना.४८ प १३६४ नम्बरको मोटरसाइकल र ना.२२ प ८१६१ नम्बरको मोटरसाइकल एकआपसमा आइतबार राति ठक्कर खाँदा गम्भीर घाइते भएका ना.२२ प ८१६१ नम्बरका मोटरसाइकल चालक पर्सागढी नगरपालिका ३ का बाग बहादुर लामाको न्यूरो अस्पताल वीरगंजमा उपचारको क्रममा मृत्यु भएको छ । साथै दुर्घटनामा घाइते भएका ना.४८ प १३६४ नम्बरका मोटरसाइकल चालक पर्सागढी नगरपालिका ४ बस्ने २७ वर्षीय रवि साहको गण्डक अस्पताल वीरगंजमा उपचार भइरहेको छ ।

दुर्घटनाका सम्बन्धमा स्थानीय प्रहरीले थप अनुसन्धान गरिरहेको बताइएको छ ।