११ भदौ, काठमाण्डौं । पत्रकार शालिकराम पुडासैनी आत्महत्या प्रकरणमा पक्राउ परेर सोमबार जिल्ला अदालत चितवनबाट धरौटीमा रिहा भएका संचारकर्मी रवि लामिछाने मंगलबार चितवनमा आफ्ना समर्थकलाई स्टेजबाट धन्यवाद दिँदै थिए ।
यता अनलाइन खबरबाट प्रशारण भएको एक भिडियो एकाएक भाइरल बन्यो, त्यो पनि नेपाल कम्युनिष्ट पार्टी (नेकपा) का अध्यक्ष पुष्पकमल दाहाल ‘प्रचण्ड’ लाई भिडकाबीच सुरक्षाकर्मीले सुरक्षा दिँदै गाडीसम्म पुर्याइको दृश्य थियो ।
, ‘कार्यकर्ताबाटै कुटिएपछि प्रचण्डको प्रहरी भ्यानबाट उद्धार’ भनेर भिडियोको क्याप्सन राखिएको थियो । ‘विप्लव फयान क्लब’ काठमाण्डौंबाट पोस्ट गरिएको उक्त भिडियो जताततै सेयर गरिनुका साथै लामिछानेको सम्बोधनको भिडियोसँगै राखेर प्रचार समेत गरिएको थियो ।
‘सिंहदरबार नजिक क. प्रचण्डमाथि सांघातिक हमलाको प्रयास । यसरी असफल पारे सुरक्षाकर्मीले ।’
‘आजै दुई तस्बिर एकैपटक भाइरल हुँदै गर्दा केही सोच्ने कि ?’
यस्तै यस्तै शिर्षक राखेर सामाजिक संजामा उक्त भिडियोको प्रचार गरिएको थियो । उक्त भिडियो हजारौको माझ पुगेको र लाखौले हेरिएको थियो । जसमा अध्यक्ष प्रचण्डलाई गाली गलौज गर्दै रविको सम्बोधनको भिडियोसँग राखेर ‘उता र यता’ भनेर दुवै भिडियोमा कमेन्ट समेत गरिएको थियो ।
सोहि घटनालाई लिएर देशमात्र नभएर विदेशमा रहेका नेपालीले पनि यसमा चासो दिए । चिन्ता मिसाएका थिए, ‘देशमा के हुन लागेको ?’ भनेर कतिले प्रश्न समेत उठाएका थिए ।
तर, उक्त पुरानो भिडियो राखेर अफवाह फैलाएको प्रति अध्यक्ष प्रचण्डको सचिवालयले खण्डन गरेको छ ।
अध्यक्षका प्रेस सल्लाहकार विष्णु सापकोटा ‘जुगल’ आफ्नो फेसबुकमार्फत् अध्यक्ष प्रचण्डप्रति कुत्सित मानसिकता भएका तत्वले उक्त अफवाह फैलाएको बताएका छन् । उनले भनेका छन्, ‘अध्यक्ष क.प्रचण्डप्रति केहि कुत्सित मानसिकता भएका तत्वहरूले अफवाह फैलाउन खोजेकोप्रति खेद व्यक्त गर्दछु । कुनै केहि घटना नभएको सबैमा जानकारी पनि गर्दछु ।’
वि.सं.२०७६ भदौ ११ बुधवार ११:१४ मा प्रकाशित
