हामी सबैकाे संसारन्यूज

२२ भाद्र, काठमाडौँ । यसवर्षको दशैंको टीकाका साइत असोज २१ गते बिहान १० बजेर ३५ मिनेटका लागि निर्धारण गरिएको छ ।

नेपाल पञ्चाङ्ग निर्णायक समितिको शनिबार बसेको बैठकले दशैंको नवरात्र (घटस्थापना)देखि विजया दशमीसम्मको साइत निर्धारण गरेको हो ।

पञ्चाङ्ग निर्णायक समितिका अध्यक्ष डा रामचन्द्र गौतमका अनुसार विजया दशमीको दिन देवी विसर्जन गर्ने साइत भने २१ गते बिहान ८ बजेर ४५ मिनेटका लागि निर्धारण गरिएको छ ।

असोज १२ गतेदेखि नवरात्र शुरु हुनेछ भने नवरात्रको पहिलो दिन घटस्थापना गर्ने साइत बिहान १० बजेर ३५ मिनेटका लागि निर्धारण गरिएको छ ।

घटस्थापनाको दोस्रो दिन असोज १३ गते नेपाली सेनाको झण्डा फेर्ने साइत तोकिएको छ । सेनाको झण्डा फेर्ने साइत बिहान १० बजेर २५ मिनेटलाई तोकिएको छ ।

१६ गते पचली भैरवको यात्रा र १८ गते फुलपातीको समय बिहान ८ बजेर ५२ मिनेटको लागि तय गरिएको छ ।

१९ गते आइतबार महाअष्टमी र कालरात्री शुरु हुनेछ । २० गते महानवमी र २१ गते विजया दशमी रहेको गौतमले जानकारी दिएका छन् ।

२६ गते कोजाग्रत पूर्णिमा रहेको छ । घटस्थापना देखि सुरु भएको दशैंपर्व कोजाग्रत पूर्णिमाका दिन समापन गरिन्छ । कोजाग्रत पूर्णिमाका दिन सम्पन्नताकी देवी महालक्ष्मीको पूजा आराधना गरी राति जाग्राम बसेपछि समापन हुन्छ ।