Sansar News
११ असोज, महादेवबेसी धादिङ । उनी कहिले छोरालाई काखमा सुताउँथिन् । कहिले पछ्यौरीले गुटुमुटु पार्थिन् । भोक÷प्यास लागे नलागेको सोध्थिन् । मिर्गौलाको उपचारका लागि छोरालाई काठमाण्डौं लैजादै गरेकी रौतहटको गरुडा नगरपालिका ८ की सिर्जना देवी साहले बिहिबार राति बसमा आँखा झिम्म गर्न पाइनन् । तर उनले बिरामी छोरालाई हस्पिटल पुर्याउन सकिनन् । काखमै छोरो गुमाउनु पर्यो ।
जनकपुरमा सम्भव नभएपछि ३५ वर्षीया छोरा रुपलाललाई थप उपचारका लागि काठमाण्डौं लैजान सिर्जना देवी साह रौतहटबाट बिहिबार साँझ ना ७ख ५३६४ नम्बरको बस चढेकी थिइन् । मध्यरातमा थाक्रे ८ चारकिलामा दुईटा मालबाहक कन्टेनर ठोक्किएर राजमार्ग अवरोध भएपछि बिरामी बोकेको उक्त बस बिहान पौने ४ बजेदेखि महादेवबेसी बजार नजिकैं हुलाक डाँडामै जाममा फसेको थियो । शुक्रबार बिहान ६ बजेतिर बसमै रुपलालको मृत्यु भएको हो ।
जाममै रहेका बेला बिहान ३ बजेतिर बिस्कुट र पानी खाएर साहको स्थिति अकस्मात गम्भीर भएपछि आफूहरुले एम्बुलेन्स खोज्न सघाएको चालक भगवान न्यौपानेले बताएको शनिबारको कान्तिपुर दैनिकमा समाचार छ । एम्बुलेन्स खोजिनसक्दै रुपलालको मृत्यु भएको थियो ।
वि.सं.२०७६ असोज ११ शनिवार ०८:४० मा प्रकाशित
