हामी सबैकाे संसारन्यूज

३ मंसिर, कन्चनपुर । डिएनए परीक्षणमै त्रुटी भएको ठहर भएपछि कन्चनपुरकी १३ वर्षीया बालिका निर्मला पन्तको बलात्कारपछि हत्या घटनामा प्रहरीले पुरानै शसंकित व्यक्तिमाथि पुन : छानविन थालेको छ ।

परिस्थिति जन्य र अन्य प्रमाणलाई आधार बनाएर प्रहरीले अनुसन्धान अघि बढाएको हो । हालसम्मको अनुसन्धानमा दिलीप सिंह विष्ट अपराधको सबैभन्दा नजिक छन् । उनलाई प्रहरीले गतवर्ष नै डिएनए नमिलेपछि छाडेको थियो । उनीलगायत पहिला पक्राउ गरेर सोधपुछ गरिएका व्यक्तिहरुमाथि नै प्रहरीले फेरि सुक्ष्म अनुसन्धान थालेको छ ।

राष्ट्रिय विधि विज्ञान प्रयोगशालाका पूर्वप्रमुख समेत रहेका डिएनए विशेषज्ञ जीवन रिजालको नेतृत्वको छानविन समितिले डिएनएको नमुना परीक्षणमै त्रुटी भएकाले सो घटनामा डिएनएबाट दोषी पत्ता नलाग्ने निष्कर्षसहित गत ५ कात्तिकमा गृहमन्त्रालयलाई प्रतिवेदन दिइसकेको छ । जसकारण प्रहरीले पहिला पक्राउ गरेर सोधपुछ गरेका व्यक्तिहरुमध्ये नै घटनाका अभियुक्त हुन सक्ने प्रहरी अधिकारीले बताएको मंगलबारको नयाँपत्रिका दैनिकमा समाचार छ ।

यसै घटनालाई पुन : अनुसन्धान गर्न भन्दै निर्मलाकी आमा दुर्गादेवीले कन्चनपुरका प्रमुख जिल्ला अधिकारी सुशील कुमार बैद्यलाई भेटेर छोरीको हत्यामा शंकास्पदमाथि पुन : अनुसन्धान गर्न माग गरेकी छन् । सोमबार जिल्ला प्रशासन कार्यालयमा उनले आफ्नो किटानी जाहेरी दिँदासमेत दिलीप सिंह विष्टमाथि अनुसन्धान नै नभएको दुःखेसो पोखेकी थिइन् ।