हामी सबैकाे संसारन्यूज

२७ मंसिर । विश्वविद्यालय कर्मचारी एकीकरण अभियान २०७५ ले काठमाडौँ विश्वविद्यालयले यसअघि भएका सम्झौता कार्यान्वयन नभएको प्रति खेद व्यक्त गर्दै आन्दोलन प्रति समर्थन जनाएको छ ।

बिहिबार अभियानका संयोजक दीपक तिवारीद्वारा जारी विज्ञप्तीमा काठमाडौँ विश्वविद्यालय कर्मचारी संघ र प्राध्यापक संघले प्राज्ञिक सुधार, संस्थागत सुधार र आफ्ना पेशागत सुरक्षा साथै हकहितका निम्ति विभिन्न मागहरु राखि लामो समयदेखि गर्दै आएको आन्दोलनप्रति जोडदार समर्थन गरिएको हो ।

आन्दोलनकर्ता संघहरु र विश्वविद्यालय व्यवस्थापन बीच सम्झौता भई २०७६ भाद्र ३० गतेदेखि सम्झौता कार्यान्वयन गर्ने गरी आन्दोलन टुंगिए पनि सम्झौता कार्यान्वयन गर्ने पक्षमा काठमाडौँ विश्वविद्यालय व्यवस्थापन पक्षले छलकपट र षड्यन्त्र गरेको अभियानको ठहर छ ।

व्यवस्थापन पक्षले माग पुरा गर्नुको सट्टा कर्मचारी तथा प्राध्यापकहरुलाई धम्क्याउने, प्रशासनमा ल्याएर तर्साउने तथा आतंकित पार्ने काम गरेको भन्दै तत्काल समस्याको समाधान खोज्न आग्रह गरिएको छ ।अन्यथा उत्पन्न परिस्थितिप्रतिको जिम्मेवार काठमाडौँ विश्वविद्यालय व्यवस्थापनपक्ष नै हुने उल्लेख छ ।

साथै त्रिभुवन विश्वविद्यालयले हालै प्रकाशित गरेको कर्मचारी खुल्ला र आन्तरिक तथा बढुवा विज्ञापनमा नमिलेको छुटेका विभिन्न पदहरु समेटी त्रिवि कार्यकारी परिषद्को निर्णयअनुसारको श्रेणीविहिन कर्मचारी र ड्राइभर पदको विज्ञापन प्रकाशित नभएको हुँदा यथाशीघ्र ती पदहरुको विज्ञापन गर्न पनि जोडदार माग गरिएको छ । विज्ञप्तीमा हाल त्रिवि कर्मचारी संघको नेतृत्वमा चलिरहेको आन्दोलनप्रति विशेष समर्थन गर्दै आन्दोलनलाई उच्च हिसाबले शसक्त बढाउन आह्वान गरिएको छ ।