हामी सबैकाे संसारन्यूज

२ पुस, काठमाडौँ । मुख्य विपक्षी दल नेपाली कांग्रेसको चालु केन्द्रीय समिति बैठक आज बुधबारलाई डाकिएको छ । मसिंर ३० गते सोमबार देखि स्थगित गरिएको बैठक बुधबार पनि बस्ने नबस्ने निश्चित नभएको पार्टी उच्च स्रोतले बताएको छ ।

महाधिवेशनको मिति र  विभागको गठन विषय पेचिलो बन्दै जाँदा चालु बैठक पनि अनिश्चित बनेको हो । मंगलबार ३ पटक संस्थाापन र पौडेलपक्षकाबीचमा वार्ता भएपनि सहमति हुन नसकेको बताइएको छ । बैठक अनिश्चित भएसँगै सभापति शेरबहादुर देउवा पक्ष र बरिष्ठ नेता रामचन्द पौडेलपक्षबीच दूरी बढ्दै गएको छ ।

यहीबीचमा तेस्रो पक्षका नेता कृष्णप्रसाद सिटौलाले आफ्नो सक्रियता बढाएका छन् । सभापती देउवा, वरिष्ठ नेता पौडेलको बार्ताटोलीबीच सहमति बन्न नसकेपछि नेता सिटौला मंगलबार राति अबेरसम्म सक्रिय रहेका थिए ।

नेता सिटौलाको सक्रियताले भात्रृसंगठन र विभाग गठनमा विवाद केही साँघुरिएको छ  सिटौलापक्षीय एक नेताले संसार न्यूजलाई बताएका छन् । ती नेताका अनुसार ‘त्रीपक्षिय सहमति हुने सम्भावना देखिए पनि भागवन्डा मिलिसकेको छैन । ’ तरुणदल र नेविसंघको भागबन्डामा कुरो अड्किएको ती नेताले बताए ।

स्रोतका अनुसार तरुणदल र नेविसंघमध्ये एकको नेतृत्व पौडेल पक्षले मागेको छ । यता सिटौला पनि आफ्नो सम्मानजनक सहभागिताबिना संगठन समायोजन, भात्रृसंस्था नेतृत्व र विभागको नेतृत्व नटुङिगने बताइरहेका छन् । यसैका लागि सिटौलाले सक्रियता बढाएको स्रोतको दाबी छ । स्रोतका अनुसार विवाद मिलाउन घनिभूत बार्ता भइरहेका छन् ।

सिटौलाले देउवा र पौडेलका वार्ताटोली सहित सभापति देउवा र नेता पौडेलसँग पनि वार्ता गरेका छन् । यसबाहेक अन्य दोस्रो तहका नेता पनि सक्रिय भएकाले आज मध्यान्हसम्म विवाद मिल्न सक्ने श्रोतको दाबी छ । आाजपनि बार्ता निष्कर्षमा नपुगे आजको बैठक दुई दिनका लागि स्थगित गर्न सकिने एक नेताले बताए ।