Sansar News
२ पुष, काठमाण्डौं । नेपाल कम्युनिष्ट पार्टी (नेकपा) को स्थायी कमिटीको आजको बैठकमा प्रचण्डपथले प्रवेश पाएको छ ।
माक्र्सवाद–लेनिनवाद–माओवाद र प्रचण्डपथ मान्दा मान्दै पार्टी फुटाएर नयाँ माओवादी बनाएको अनुभव संगालिसकेका नेता मातृका यादवले प्रचण्डपथ त्यागेको धेरै वर्षपछि यो विषय प्रवेश गराएका हुन् ।
मदन भण्डारीद्धारा प्रतिपादीत बहुदलीय जनवाद र तत्कालिन नेकपा माओवादी केन्द्रको एक्काइसौं शताब्दिको जनवादलाई समायोजन गरेर दुई अध्यक्षद्धारा ‘समाजवाद उन्मुख जनताको जनवाद’ अघि सारिएकै बेला मातृका यादवद्धारा यस्तो प्रस्ताव आएको छ ।
तत्कालिन नेकपा माओवादीको २०५७ मा सम्पन्न दोश्रो राष्ट्रिय सम्मेलनमा शुरु गरिएको प्रचण्डपथ २०६५ मा आइपुग्दा परित्याग भएको थियो । अहिले त्यहि प्रचण्डपथलाई पार्टीको मार्गनिर्देशन सिद्धान्त मान्न आग्रह गर्दै स्थायी समिति सदस्य मातृका यादवले आफ्नो मत दर्ज गराएका हुन् ।
वि.सं.२०७६ पुस २ बुधवार १७:४० मा प्रकाशित
