हामी सबैकाे संसारन्यूज

९ पुष, काठमाडौँ । ‘छल गर्यो मायाले, छल गर्यो मायाले…’ गीत गाएर स्रोतलाई मनोरञ्जन दिएका गायक रामकृष्ण ढकालको आफ्नै जीवनसँग मेल खाएको छ,यो गीत । गीतले भने झैँ गायक ढकाललाई मायाले छल गरेको छ । प्रेमलाई विवाहमा परिणत गरि मायाको चिनो, छोरी समेत जन्माएका गायक रामकृष्ण ढकाल दम्पत्तिको सम्बन्धविच्छेद भएको छ ।

बुधबार जिल्ला अदालत काठमाडौंमा गायक ढकाल र श्रीमती निलम शाह ढकालबीच सम्बन्धविच्छेद भएको हो । पत्नी निलम साह ढकालले मंगलबार सम्बन्धविच्छेदका लागि दिएको निवेदनमा जिल्ला अदालत काठमाडौंका न्यायाधीश विदुर कोइरालाको इजलासमा सम्बन्ध विच्छेद गर्न उनीहरुले मिलापत्र गरेका हुन् ।

गायक ढकाल र निलमले सम्बन्धविच्छेद गर्न मञ्जुर छौं भनी मिलापत्र गरेको जिल्ला अदालत काठमाडौंका श्रेस्तेदार आनन्दप्रसाद श्रेष्ठले बताए। उनीहरूबीच सम्बन्धविच्छेद भएपछि छोरी भने आमासँगै बस्ने भएकी छिन्। शाहले ढकालबाट कुनै पनि अंश वा सेवा सुविधा नलिने भएकी छिन्।तर, छोरीको लालनपालनमा भने उनीहरूको बराबरीको हुने आदेश भएको छ ।